കൊച്ചി: സമയവും സന്ദര്ഭവും നോക്കാതെയുള്ള മാധ്യമപ്രവര്ത്തകന്റെ ചോദ്യങ്ങളോട് ക്ഷുഭിതനായി നടന് മോഹന്ലാല്. പ്രളയബാധിത പ്രദേശത്ത് ദുരിതാശ്വാസ സാധനങ്ങൾ എത്തിക്കുന്നതിന്റെ രണ്ടാംഘട്ട പ്രവർത്തനങ്ങളുമായി ബന്ധപ്പെട്ട് കൊച്ചിയില് എത്തിയതായിരുന്നു മോഹൻലാൽ.
ദുബായിൽ നിന്നും വിശ്വശാന്തി ഫൗണ്ടേഷൻ വഴി ശേഖരിച്ച സാധനങ്ങൾ ആലപ്പുഴ, പത്തനംതിട്ട ജില്ലകളിലേക്ക് എത്തിക്കുകയായിരുന്നു ലക്ഷ്യം. വിശ്വശാന്തി ഫൗണ്ടേഷനൊപ്പം വിദേശത്തുള്ള ലാൽ കെയർ ഫൗണ്ടേഷന്റെയും നേതൃത്വത്തിലും സാധനങ്ങൾ ശേഖരിച്ചിരുന്നു. വയനാട് മാനന്തവാടിയിലാണ് സംഘടനയുടെ നേതൃത്വത്തിൽ ആദ്യഘട്ട സഹായം നൽകിയത്. വെല്ലിംഗ്ടൺ ഐലൻഡിലെ കളക്ഷൻ സെന്ററിൽ നേരിട്ടെത്തിയായിരുന്നു മോഹൻലാൽ ദുരിതാശ്വാസ സാമഗ്രികൾ കൈമാറിയത്.
വിശ്വശാന്തി ഫൗണ്ടേഷന്റെ പ്രവർത്തനങ്ങളെ കുറിച്ച് മോഹൻലാൽ വിശദീകരിച്ച ശേഷം, ഒരു മാധ്യമപ്രവര്ത്തകന് ജലന്ധർ ബിഷപ്പിനെതിരെ കന്യാസ്ത്രീകൾ നടത്തുന്ന സമരത്തെ കുറിച്ചുള്ള പ്രതികരണം തേടിയത്. ‘മോനെ നല്ലൊരു കാര്യം പറയുമ്പോൾ നിങ്ങൾക്ക് നാണമുണ്ടോ ഇങ്ങനെ ചോദിക്കാനെന്ന് മാധ്യമപ്രവർത്തകരോട് മോഹൻലാൽ ചോദിച്ചു. കന്യാസ്ത്രീക്ക് എന്ത് ചെയ്യണം, വേറെ എന്തൊക്കെ കാര്യങ്ങളുണ്ട് ചോദിക്കാൻ. ഇത്രയും വലിയൊരു പ്രോബ്ലം നടക്കുമ്പോൾ ഇതൊരു പൊതുവികാരമാണോ‘യെന്നും മോഹൻലാൽ ചോദിച്ചു.
