കുമളി: പെരിയാര് വന്യജീവി സങ്കേതവുമായി ബന്ധപ്പെട്ട് പ്രവര്ത്തിക്കുന്ന ഇക്കോ ഡെവലപ്മെന്റ് കമ്മിറ്റികളില് (ഇഡിസി) വന് സാമ്പത്തിക ക്രമക്കേട്. ഇഡിസികളുടെ കീഴില് പ്രവര്ത്തിക്കുന്ന സ്വാശ്രയ സംഘങ്ങളിലെ(എസ്എച്ച്ജി) സാമ്പത്തിക ഇടപാടുകളിലാണ് കാലങ്ങളായി തിരിമറി നടക്കുന്നതായുള്ള വിവരം പുറത്തായത്.
ഇഡിസികളില് നിന്ന് അനുവദിച്ച വായ്പ തിരിച്ചടവില് ആണ് ക്രമക്കേട് കണ്ടെത്തിയത്. അംഗങ്ങളില്നിന്ന് വായ്പ തിരിച്ചടവ് തുക ഫെസിലിറ്റേറ്റര്മാര് കൈപ്പറ്റിയ ശേഷം ബാങ്കില് നിക്ഷേപിക്കാത്തതായി പരിശോധനയില് കണ്ടെത്തി. വായ്പതുക പൂര്ണമായി അടച്ച് തീര്ത്ത സംഘങ്ങള് വീണ്ടും വായ്പക്കായി ഇഡിസികളെ സമീപിച്ചപ്പോഴാണ് തങ്ങള്ക്ക് കുടിശ്ശികയുള്ളതായി രേഖകളില് കണ്ടെത്തിയത്. പെരിയാര് വന്യജീവി സങ്കേതങ്ങളിലെ വനവാസികളുടെയും വനാതിര്ത്തി പ്രദേശങ്ങളില് താമസിക്കുന്ന സാധാരണക്കാരുടെയും പുനരധിവാസം ലക്ഷ്യമാക്കി രൂപീകരിച്ച സംവിധാനമാണ് ഇക്കോ ഡെവലപ്മെന്റ് കമ്മിറ്റികള്.
ഇവയുടെ പ്രവര്ത്തനങ്ങള്ക്കായി കോടികള് വകയിരുത്തുന്നുണ്ട്. ഓരോ ഇഡിസികളിലും അമ്പത് മുതല് നൂറ് വരെ കുടുംബങ്ങളാണ് അംഗങ്ങള്. അംഗങ്ങളില്നിന്ന് ഒന്പത് പേരടങ്ങുന്ന ഒരു കമ്മിറ്റിയും നിലവിലുണ്ട്. വനംവകുപ്പ് ഉദ്യോഗസ്ഥനെ മെമ്പര് സെക്രട്ടറിയായും നിയമിച്ചിരുന്നു. കൂടാതെ ഒന്നിലധികം ഇഡിസിയുടെ ഏകോപനത്തിനായി പ്രത്യേകം മേല്നോട്ടക്കാരെയും നിയമിച്ചിരുന്നു. ഇത്തരത്തിലുള്ള 38 ഇഡിസികളാണ് പെരിയാര് വന്യജീവി സാങ്കേതത്തിന്റെ ഭാഗമായിട്ടുള്ളത്.
ഓരോ ഇഡിസിക്കും കീഴില് നിരവധി സ്വാശ്രയ സംഘങ്ങള് പ്രവര്ത്തിക്കുന്നുണ്ട്. ഇത്തരം എസ്എച്ച്ജികളുടെ പണമിടപാടുകള്ക്കായി ഇടുക്കി ജില്ലാ സഹകരണ ബാങ്കിന്റെ കുമളി ശാഖയിലാണ് അക്കൗണ്ടുകള് തുറന്നിരിക്കുന്നത്. എസ്എച്ച്ജികളിലെ അംഗങ്ങള് ഓരോ ആഴ്ചയിലും നടത്തുന്ന പണമിടപാടുകള് ബാങ്കില് ക്രയവിക്രയം ചെയ്യാതെ ചിലര് ക്രമക്കേട് നടത്തിയെന്നാണ് പുറത്തുവരുന്ന വിവരം. ഇഡിസികളില് ചിലതിന്റെ കണക്കുകള് മാത്രം പരിശോധിച്ചപ്പോള് എട്ട് ലക്ഷത്തോളം രൂപയുടെ തിരിമറി കണ്ടെത്തിയതായി വിവരമുണ്ട്.
ക്രമക്കേട് കണ്ടെത്തിയതിനെ തുടര്ന്ന് വകുപ്പ്തല അന്വേഷണത്തില് കുറ്റക്കാരെന്ന് കണ്ടത്തിയവരില് ചിലര്ക്കെതിരെ മാത്രം നടപടിയെടുത്ത് മറ്റുള്ളവരെ ചുമതലയില് നിലനിര്ത്താനുള്ള നീക്കമാണ് ഇപ്പോള് നടക്കുന്നത്. അതേസമയം ക്രമക്കേട് പുതിയ സംഭവമല്ലെന്നും മുഴുവന് ഇക്കോ ഡെവലപ്മെന്റ് കമ്മിറ്റികളുടെയും തുടക്കം മുതലുള്ള സാമ്പത്തിക ഇടപാടുകള് വിശദമായ പരിശോധനക്ക് വിധേയമാക്കണമെന്ന ആവശ്യം വനവാസി ഊരുകളില്നിന്ന് ഉയര്ന്നുകഴിഞ്ഞു. പട്ടികവര്ഗ വിഭാഗങ്ങളുടെ സാമൂഹ്യ പിന്നോക്കാവസ്ഥക്ക് മാറ്റമുണ്ടാക്കാന് ലക്ഷ്യംവച്ച് തുടങ്ങിയ പദ്ധതികള് ഭരണകക്ഷി നേതാക്കളുടെ ഒത്താശയോടെ ചിലര് അട്ടിമറിക്കുകയാണെന്ന ആക്ഷേപവും ശക്തമാണ്.
സ്വന്തം ലേഖകന്
