കിഗ്ലി: ലോകത്താകമാനം ഭാരതത്തിൻ്റേതായ സ്വാധീനം ചെലുത്തന്നതിൽ ഇന്ത്യൻ സമൂഹത്തിന് കാര്യമായ പങ്കുണ്ടെന്ന് പ്രധാനമന്ത്രി നരേന്ദ്രമോദി. ഭാരതത്തിന്റെ ദൂതന്മാരാണ് പ്രവാസികളായ ഇന്ത്യക്കാരെന്നും പ്രധാനമന്ത്രി പറഞ്ഞു. ആഫ്രിക്കൻ സന്ദർശനത്തോടനുബന്ധിച്ച് റുവാണ്ടയിൽ ഇന്ത്യക്കാരോട് സംസാരിക്കുകയായിരുന്നു അദ്ദേഹം.
റുവാണ്ടയിലെ ഇന്ത്യക്കാരുമായി ആശയവിനിമയം നടത്തുന്നതിൽ തനിക്ക് അതിയായ സന്തോഷമുണ്ട്, ഇന്ത്യക്കാർ റുവാണ്ടയ്ക്ക് നൽകുന്ന സംഭാവനകളെക്കുറിച്ച് പ്രസിഡൻ്റ് പുൾക്കാഗ്മെ തന്നോട് അറിയിച്ചു, നിരവധി സാമൂഹിക സേവനങ്ങളും ഇന്ത്യക്കാർ റുവാണ്ടയിൽ ചെയ്യുന്നുണ്ട്. ഇത് കേട്ടതിൽ താൻ ഏറെ സന്തോഷിക്കുന്നുണ്ട്- പ്രധാനമന്ത്രി പറഞ്ഞു.
കഴിഞ്ഞ നാല് വർഷമായി ഇന്ത്യൻ സമൂഹത്തിന്റെ ആവശ്യമായിരുന്നു ഹൈക്കമ്മീഷൻ എന്നത്, ഈ ആവശ്യം ഉടൻ തന്നെ പൂർത്തീകരിക്കും, ഇന്ത്യയുമായി കൂടുതൽ അടുക്കാൻ അവസരമുണ്ടാകും-ഇന്ത്യക്കാരോടായി മോദി പറഞ്ഞു. വിവിധ ഉഭയകക്ഷി ബന്ധങ്ങൾ ശക്തപ്പെടുത്തുന്നതിന് ഇരു രാജ്യങ്ങളും ഒന്നിച്ച് തീരുമാനമെടുത്തിട്ടുണ്ട്. സുരക്ഷ, കൃഷി തുടങ്ങിയ മേഖലകളിലാണ് പ്രധാനമായും ഇരു രാജ്യങ്ങളും തമ്മിൽ ഉടമ്പടികളിൽ ഒപ്പ് വയ്ക്കുന്നത്.
റുവാണ്ടയിൽ രണ്ട് ദിവസത്തെ സന്ദർശനമാണ് പ്രധാനമന്ത്രി നടത്തുന്നത്. റുവാണ്ട സന്ദർശിക്കുന്ന ആദ്യ ഇന്ത്യൻ പ്രധാനമന്ത്രിയാണ് നരേന്ദ്ര മോദി. 200 പശുക്കളെയാണ് ഇന്ത്യ റുവാണ്ടയ്ക്ക് നൽകുന്നത്.
