തൃശൂര്: ശ്രീഗുരുവായൂരപ്പന്റെ തിരുനാമ മാഹാത്മ്യ പ്രചരണം ജീവിത വ്രതമാക്കിയ ആഞ്ഞം മാധവന് നമ്പൂതിരിയുടെ (തിരുനാമാചാര്യന്) ജന്മശതാബ്ദി ആഘോഷങ്ങള് 21 മുതല് 23 വരെ ഗുരുവായൂര് കിഴക്കേനടയിലുള്ള രുഗ്മണി റീജന്സി ഓഡിറ്റോറിയത്തില് നടക്കുമെന്ന് സംഘാടക സമിതി ഭാരവാഹികള് വാര്ത്താസമ്മേളനത്തില് അറിയിച്ചു.
21ന് രാവിലെ 10ന് നടക്കുന്ന ആഘോഷ പരിപാടികള് മഹാരാഷ്ട്ര മുന് ഗവര്ണര് കെ. ശങ്കരനാരായണന് ഉദ്ഘാടനം ചെയ്യും. ഗുരുവായൂര് ദേവസ്വം ചെയര്മാന് അഡ്വ.കെ.ബി. മോഹന്ദാസ് അധ്യക്ഷത വഹിക്കും. ഭാഗവത ആചാര്യന്മാരെയും വേദപണ്ഡിതരെയും ആദരിക്കും. ഉച്ചതിരിഞ്ഞ് മൂന്നിന് തിരുനാമാചാര്യ അനുസ്മരണ സമ്മേളനം ഗവര്ണര് പി. സദാശിവം ഉദ്ഘാടനം ചെയ്യും. മന്ത്രി കടകംപള്ളി സുരേന്ദ്രന് അധ്യക്ഷത വഹിക്കും. തുടര്ന്ന് നാരായണീയാചാര്യ ആദരണം, ഭക്തിഗാന സുധ.
22ന് രാവിലെ 10ന് യതി സംഗമത്തില് വിവിധ സന്യാസി മഠങ്ങളിലെ സന്യാസിമാര്ക്ക് പാദപൂജയും സത്സംഗവും നടക്കും. ഉച്ചതിരിഞ്ഞ് മൂന്നിന് ജന്മശതാബ്ദി സമ്മേളനം മിസോറാം ഗവര്ണര് കുമ്മനം രാജശേഖരന് ഉദ്ഘാടനം ചെയ്യും. മന്ത്രി വി.എസ്. സുനില്കുമാര് അധ്യക്ഷത വഹിക്കും. എം.പി. വീരേന്ദ്രകുമാര്, പി.ടി. മോഹനകൃഷ്ണന്, ചൊവ്വല്ലൂര് കൃഷ്ണന്കുട്ടി, എ. വേണുഗോപാലന് എന്നിവരെ തിരുനാമാചാര്യ ശതാബ്ദി മുദ്ര നല്കി ആദരിക്കും. തുടര്ന്ന് നാരായണീയാചാര്യ സമാദരണം, മേതില് ദേവികയും സംഘവും അവതരിപ്പിക്കുന്ന നൃത്തനൃത്യങ്ങള് എന്നിവയുണ്ടാകും.
23ന് ഗുരുവായൂരപ്പന് ഉദയാസ്തമനപൂജ, വിശേഷാല് മേളത്തോടെ കാഴ്ചശീവേലി, ചുറ്റുവിളക്ക്, ഏകദിന തിരുനാമയജ്ഞം. രാവിലെ 8.30ന് നാരായണാലയത്തില് നിന്നു തിരുനാമാചാര്യപുരിയിലേക്ക് ശതകോടി ലിഖിതജപ ഗ്രന്ഥഘോഷയാത്ര. 10ന് തിരുനാമാചാര്യ ജയന്തി സമ്മേളനം പ്രധാനമന്ത്രി നരേന്ദ്ര മോദി വീഡിയോ കോണ്ഫറന്സിലൂടെ ഉദ്ഘാടനം ചെയ്യം. കേന്ദ്ര മാനവ വിഭവശേഷി സഹമന്ത്രി ഡോ. സത്യപാല് സിങ് അധ്യക്ഷത വഹിക്കും. ഗുരുവായൂര് തന്ത്രി ചേന്നാസ് ദിനേശന് നമ്പൂതിരിപ്പാട് ഉപഹാര സമര്പ്പണം നടത്തും.
ആഘോഷങ്ങളോടനുബന്ധിച്ച് മൂന്നു ദിവസവും നാരായണാലയത്തില് ഗണപതിഹോമം, സോപാന സംഗീതം, പൂന്താനം കണ്ണന്റെ സന്നിധിയില് തിരുനാമജപം, രുഗ്മണി റീജന്സി ഓഡിറ്റോറിയത്തില് സഹസ്ര നാരായണീയ പാരായണം, സമ്പൂര്ണ നാരായണീയ പാരായണം എന്നിവ നടക്കും. വാര്ത്താസമ്മേളനത്തില് ആഘോഷ സമിതി ചെയര്മാന് സ്വാമി സന്മയാന്ദ സരസ്വതി, സെക്രട്ടറി പ്രൊഫ.എം. മാധവന്കുട്ടി, കോ-ഓര്ഡിനേറ്റര് എ. വേണുഗോപാലന്, ജി.കെ. ഗോപാലകൃഷ്ണന്, അപ്പു വാര്യര് എന്നിവര് പങ്കെടുത്തു.
