കൊച്ചി: ജസ്നയെക്കുറിച്ച് വിവരമൊന്നും ലഭിച്ചിട്ടില്ലെന്ന് സര്ക്കാര് ഹൈക്കോടതിയെ അറിയിച്ചു. ജെസ്നയെ കണ്ടെത്താന് സാധ്യമായതെല്ലാം ചെയ്യുന്നുണ്ടെന്നും സര്ക്കാര് കോടതിയില് സമര്പ്പിച്ച സത്യവാങ്മൂലത്തില് പറയുന്നു.
തിരുവല്ല ഡിവൈഎസ്പി ചന്ദ്രശേഖരപിള്ളയാണ് സത്യവാങ്മൂലംസമര്പ്പിച്ചത്. കേസുമായി ബന്ധപ്പെട്ട് ഇതുവരെ 250 പേരെ ചോദ്യം ചെയ്തു. 120 പേരുടെ മൊഴി രേഖപ്പെടുത്തി. ഒരു ലക്ഷത്തോളം ഫോണ്കോളുകള് പരിശോധിച്ചതായും രേഖാമൂലം നല്കിയ സത്യവാങ്മൂലത്തില് പറയുന്നു. ഇരുപത്തിയൊന്ന് വയസ്സായ പെണ്കുട്ടിയെയാണ് കാണാതായിരിക്കുന്നത്. അതിന്റെ ഗൗരവം ഉള്ക്കൊണ്ടുള്ള അന്വേഷണം തന്നെയാണ് പോലീസ് നടത്തുന്നത്. സാധ്യമായ തരത്തിലുള്ള അന്വേഷണങ്ങളെല്ലാം ഇതുമായി ബന്ധപ്പെട്ട് നടത്തുന്നുണ്ടെന്നും സര്ക്കാര് കോടതിയെ ധരിപ്പിച്ചു.
ജസ്നയെ കണ്ടുവെന്ന് സന്ദേശങ്ങള് ലഭിച്ച സ്ഥലങ്ങളിലെല്ലാം പോയി അന്വേഷണം നടത്തി. എന്നാല്,ഒരിടത്തു പോലും കണ്ടത് ജെസ്നയെയാണെന്ന് സ്ഥിരീകരിക്കാന് സാധിച്ചിട്ടില്ല. ജെസ്നയുടെ പിതാവ് നിര്മ്മിക്കുന്ന വീട്ടില് പരിശോധന നടത്തിയെങ്കിലും തെളിവുകളൊന്നും ലഭിച്ചില്ല. വീട്ടുകാര്ക്കെതിരായ ആരോപണങ്ങളിലും അന്വേഷണം നടത്തിയെങ്കിലും ഇത് ശരിയാണെന്ന തരത്തിലുള്ള തെളിവുകളൊന്നും ലഭിച്ചിട്ടില്ല.
