ന്യൂദല്ഹി: രാജ്യത്തെ എയര് കണ്ടീഷനുകളിലെ താപനില 24 ഡിഗ്രി സെല്ഷ്യസായി ക്രമീകരിക്കാനുള്ള നിര്ദേശം കേന്ദ്രസര്ക്കാര് പരിഗണിക്കുന്നു. വര്ധിച്ചു വരുന്ന ഊര്ജ ഉപയോഗം കുറക്കുക എന്ന ലക്ഷ്യം മുന്നില് കണ്ടാണ് ഈ നീക്കം.
എയര് കണ്ടീഷന് താപനില 24 മുതല് 26 ഡിഗ്രി സെല്ഷ്യസായി നിജപ്പെടുത്താനാണ് ആലോചന. വിഷയവുമായി ബന്ധപ്പെട്ട് എസി നിര്മാതാക്കളുമായി കൂടിക്കാഴ്ച നടത്തിയെന്ന് കേന്ദ്രമന്ത്രി ആര്.കെ.സിംഗ് പറഞ്ഞു.
തീരുമാനം നടപ്പായാല് പരിസ്ഥിതിക്ക് ദോഷകരമായ ഹരിതഗൃഹ വാതകം പുറന്തള്ളുന്നത് വളരെ വലിയ രീതിയില് കുറക്കാന് സാധിക്കും. നിലവില് 18 മുതല് 21 ഡിഗ്രി സെല്ഷ്യസിലാണ് പലയിടത്തും എസികള് പ്രവര്ത്തിക്കുന്നത്. ആളുകളുടെ ആരോഗ്യത്തെയും ഇത് വലിയ തോതില് ബാധിക്കുന്നുണ്ട്. ഇതുമായി ബന്ധപ്പെട്ട് ജനങ്ങള്ക്കിടയില് അഭിപ്രായ സര്വേ നടത്തിയതിനു ശേഷം അന്തിമ തീരുമാനമെടുക്കുമെന്നും മന്ത്രി പറഞ്ഞു.
