ഛാന്ദോഗ്യോപനിഷത്ത് 58
അന്നത്തെ ബ്രഹ്മമായി ഉപാസിക്കണമെന്ന് കേട്ട നാരദന്‍ അന്നത്തേക്കാള്‍ കേമമായി മറ്റെ ന്തെങ്കിലുമുണ്ടോ എന്ന് ചോദിച്ചു. ഉണ്ടെന്ന് സനത് കുമാരന്‍ പറഞ്ഞു. അതിനെ ഉപദേശിച്ചു തരാന്‍ ആവശ്യപ്പെട്ടു.
ആപോ വാവാന്നാദ് ഭൂയ, സ്തസ്മാദ് യദാ സുവൃഷ്ടിര്‍ന്ന ഭവതി വ്യാധീയന്തേ… ആപ ഏവേമാ മൂര്‍ത്താ അപ ഉപാസ്സ്വേതി ജലം അന്നത്തേക്കാള്‍ ശ്രേഷ്ഠമാണ്. നല്ല മഴയില്ലാതിരിക്കമ്പോള്‍ അന്നം കുറവാകും എന്ന് കരുതി ജീവജാലങ്ങള്‍ ദുഃഖിക്കുന്നു. നല്ല മഴയുണ്ടാകുമ്പോള്‍ അന്നം ധാരാളം ഉണ്ടാകുമെന്നതിനാല്‍ ജീവികള്‍ സന്തോഷിക്കുന്നു. ഈ ഭൂമി മൂര്‍ത്തമായ അപ്പുകള്‍ തന്നെയാണ്. അന്തരീക്ഷം, ദ്യോവ്, പര്‍വ്വതങ്ങള്‍, ദേവന്മാര്‍, മനുഷ്യര്‍, മൃഗങ്ങള്‍, പക്ഷികള്‍, പുല്ല്, മരങ്ങള്‍, കീടം, പാറ്റ, ഉറുമ്പ് എന്നിവയെല്ലാം മൂര്‍ത്തങ്ങളായ അപ്പുകളാണ്. അപ്പുകളെ ഉപാസിക്കണം.
അന്നത്തിന് കാരണം ജലമായതിനാലാണ് അപ്പുകളെ ശ്രേഷ്ഠമായി പറഞ്ഞത്. മൂര്‍ത്തമായ അന്നം അപ്പുകളില്‍ നിന്ന് ഉണ്ടാകുന്നതിനാല്‍ ഭൂമി തുടങ്ങിയ മൂര്‍ത്ത ഭേദങ്ങളും അപ്പുകളാണ്. അതിനാല്‍ അപ്പുകളെ ബ്രഹ്മമായി ഉപാസിക്കണം .
സ യോളപോ ബ്രഹ്മേത്യുപാസ്‌തേ ആപ്‌നോതി സര്‍വ്വാന്‍ കാമാംസ്തൃപ്തി മാന്‍ ഭവതി…
അപ്പുകളെ ബ്രഹ്മമായി ഉപാസിക്കുന്നയാള്‍ക്ക് എല്ലാ ആഗ്രഹങ്ങളും സാധിക്കുന്നു. അയാള്‍ തൃപ്തിയുള്ളവനാകും. അപ്പുകള്‍ക്ക് വിഷയമായവയിലെല്ലാം ഇഷ്ടംപോലെ സഞ്ചരിക്കുവാനുള്ള സ്വാതന്ത്ര്യം അയാള്‍ക്കുണ്ടാകും.
അപ്പുകളെ ബ്രഹ്മമായി ഉപാസിക്കണമെന്ന് കേട്ട നാരദന്‍ അതിനേക്കാള്‍ കേമമായി എന്തെങ്കിലുമുണ്ടോ എന്ന് ചോദിച്ചു. ഉണ്ടെന്ന് സനത് കുമാരനും .
എന്നാല്‍ അത് പറഞ്ഞ് തരണേ…. തേജോ വാവദ്‌ഭ്യോ ഭൂയഃ തദ് വാ ഏതദ് വായുമാ ഗൃഹ്യാകാശമഭിതപതി… തേജ ഏവ തത് പൂര്‍വം ദര്‍ശയിത്വാ ഥാപഃ സൃജതേ, തേജ ഉപാ സ്സ്വേതി.
തേജസ്സ് ജലത്തേക്കാള്‍ ശ്രേഷ്ഠമാണ്. അങ്ങനെയുള്ള തേജസ്സ് വായുവിനെ നിശ്ചലമാക്കി ആകാശത്തെ ചൂടുപിടിപ്പിക്കുന്നു. അപ്പോള്‍ ആളുകള്‍ പറയും ‘ വല്ലാത്ത ചൂട്… എന്തൊരു പുഴുക്കം… മഴ പെയ്യും എന്ന്. തേജസ്തന്നേ ആദ്യം പ്രകടമാക്കി, പിന്നെ ജലത്തെ സൃഷ്ടിക്കുന്നു. ഈ തേജസ്സ് മുകളിലേക്കും വശങ്ങളിലേക്കും പോകുന്ന മിന്നലുകളോടെ ഇടി മുഴക്കമായി സഞ്ചരിക്കുന്നു. അപ്പോള്‍ ആളുകള്‍ പറയും ഇടി മിന്നുന്നു… ഇടിവെട്ടുന്നു… തീര്‍ച്ചയായും മഴ പെയ്യും എന്ന് തേജസ്സ് തന്നേ ആദ്യം കാണിച്ച് പിന്നെ ജലത്തെ സൃഷ്ടിക്കുന്നു. അതിനാല്‍ തേജസ്സിനെ ഉപാസിക്കണം.
ഉഷ്ണം കൂടുമ്പോഴും ഇടിവെട്ട് ഉണ്ടാകുമ്പോഴും അധികം വൈകാതെ മഴയ്‌ക്ക് സാധ്യതയുണ്ടെന്ന് ആളുകള്‍ക്ക് മനസ്സിലാവും. മഴയ്‌ക്ക് കാരണമായ തേജസ്സിന്റെ സാന്നിധ്യം അറിഞ്ഞാണ് ഇത് പറയുന്നത് .കാരണം വ്യക്തമായി കാണുമ്പോള്‍ കാര്യം ഉണ്ടാകുമെന്ന് ഊഹിക്കാം. അതിനാല്‍ ജലത്തിനു കാരണമായ തേജസ്സിനെ ബ്രഹ്മമായി ഉപാസിക്കാന്‍ ഉപദേശിക്കുന്നു.
സ യസ്‌തേജോ ബ്രഹ്മേത്യുപാസ്‌തേ, തേജസ്വീവൈ സ തേജസ്വതോ ലോകാന്‍ ഭാസ്വ തോളപഹതതമസ്‌കാനഭി സിധ്യതി…
തേജസ്സിനെ ബ്രഹ്മമായി ഉപാസിക്കുന്നയാള്‍ സ്വയം തേജസ്സായിത്തീരുന്നു. തേജസ്സുള്ള ശോഭിക്കുന്ന അന്ധകാരം നീങ്ങിയ ലോകങ്ങളെ പ്രാപിക്കും. തേജസ്സിന് വിഷയമായവയിലെല്ലാം ഇഷ്ടം പോലെ സഞ്ചരിക്കാനുള്ള സ്വാതന്ത്ര്യവും ഉണ്ടാകും.
സ്വാമി അഭയാനന്ദ
ചിന്മയ മിഷന്‍, തിരുവനന്തപുരം
