തലശ്ശേരി: മകളൂടെ കല്യാണത്തിന് ഓഡിറ്റോറിയം ബുക്ക് ചെയ്ത പിതാവിനോട് പണം മുന്കൂര് വാങ്ങിയ ശേഷം വിശ്വാസ വഞ്ചന കാട്ടിയെന്ന പരാതിയില് സ്ഥാപന ഉടമയോടും മാനേജരോടും കോടതിച്ചെലവടക്കം നഷ്ടപരിഹാരം നല്കണമെന്ന് കണ്ണൂര് ഉപഭോക്തൃ തര്ക്ക പരിഹാര ഫോറത്തിന്റെ ഉത്തരവ്. തലശ്ശേരി ചാലില് റോഡിലെ മാളിക വീട്ടില് പി.ഇബ്രാഹിമിനാണ് തലശ്ശേരി ചിറക്കര സീതി സാഹിബ് റോഡിലെ ഷാസി മഹല് ഓഡിറ്റോറിയം ഉടമ നാലു പുരക്കല് ഷംസുവും മാനേജര് കെ.പി.കരുണാകരനും ചേര്ന്ന് മുന്കൂര് വാങ്ങിയ 8000 രൂപയും നഷ്ടപരിഹാരവും കോടതി ചിലവുമടക്കം 3,000 രൂപയും 12 ശതമാനം പലിശ സഹിതം നല്കേണ്ടത്.
2013 മാര്ച്ച് 10ന് നടക്കേണ്ടിയിരുന്ന മകളുടെ വിവാഹത്തിനായി ഒരു മാസം മുന്പെ പരാതിക്കാരന് 8000 രൂപ മുന്കൂര് അടച്ച് ഓഡിറ്റോറിയം ബുക്ക് ചെയ്തിരുന്നു. പാത്രങ്ങളും മേശ, കസേരകള് ഉള്പ്പെടെ 15000 രൂപയാണ് വാടക നിശ്ചയിച്ചിരുന്നത്. എന്നാല് ബുക്ക് ചെയ്തതിന്റെ തൊട്ടു പിറ്റേന്നാള് ഓഡിറ്റോറിയം മാനേജര്, ഇബ്രാഹിമിനെ വിളിച്ച് വാടക പറഞ്ഞത് തെറ്റിപ്പോയെന്നും 26000 വേണമെന്നും ആവശ്യപ്പെട്ടുവത്രെ. വാക്ക് മാറ്റിയതിനാല് തനിക്ക് ഓഡിറ്റേറിയം വേണ്ടെന്നും മുന്കൂര് നല്കിയ പണം തിരിച്ചു നല്കണമെന്നും ഇബ്രാഹിം മറുപടി നല്കി. ആദ്യം തരാമെന്ന് സമ്മതിച്ച മാനേജര് മാസങ്ങള് കഴിഞ്ഞിട്ടും പണം തിരികെ കൊടുത്തില്ല. വ്യവസ്ഥകള് പ്രകാരം മുന്കൂര് നല്കിയ കാശ് തിരിച്ചു നല്കാനാവില്ലെന്ന നിലപാടിലായിരുന്നു ഉടമയും മാനേജരും. ഇതേ തുടര്ന്നാണ് അഡ്വ.ടി.കെ.ഗംഗാധരന് മുഖേന ഇബ്രാഹിം ഉപഭോക്ത തര്ക്ക പരിഹാര ഫോറത്തെ സമീപിച്ചത്. ഇരു വിഭാഗത്തിന്റെയും വാദം കേട്ടതിന് ശേഷമാണ് പരാതിക്കാരന് നഷ്ടപരിഹാരം അനുവദിച്ചത്. 30 ദിവസത്തിനകം പണം നല്കണമെന്നാണ് വിധി.
