ചക്കരക്കല്: അഞ്ചരക്കണ്ടി മെഡിക്കല് കോളജ് അടച്ചുപൂട്ടണമെന്നാവശ്യപ്പെട്ട് ബിജെപി 27ന് മെഡിക്കല് കോളജിലേക്ക് ബഹുജന മാര്ച്ച് നടത്തും. വിവിധ ആവശ്യങ്ങളുന്നയിച്ചുകൊണ്ട് മെഡിക്കല് കോളജിനെതിരെ നാട്ടുകാര് നടത്തിവരുന്ന സമരത്തിന് പിന്തുണ പ്രഖ്യാപിച്ചുകൊണ്ട് ബിജപി ധര്മ്മടം നിയോജകമണ്ഡലം കമ്മറ്റി നടത്തുന്ന പ്രക്ഷോഭങ്ങളുടെ ഭാഗമായാണ് ബഹുജന മാര്ച്ച്. മാര്ച്ച് യുവമോര്ച്ച സംസ്ഥാന പ്രസിഡണ്ട് കെ.പി.പ്രകാശ് ബാബു ഉദ്ഘാടനം ചെയ്യുമെന്നും ഭാരവാഹികള് വാര്ത്താസമ്മേളനത്തില് അറിയിച്ചു.
ശാസ്ത്രീയമായരീതിയില് മാലിന്യപ്ലാന്റ് നിര്മ്മിക്കാതെ കുഴികളുണ്ടാക്കി കക്കൂസ് മാലിന്യമടക്കം ഇതിലേക്ക് വിടുന്നതിനാല് മെഡിക്കല് കോളജിന്റ സമീപ്രദേശങ്ങളില് താമസിക്കുന്ന നല്പതോളം വീടുകളിലെ കിണര്ജലം മലിനമായിരിക്കുകയാണ്. ഇത് പലതവണ മാനേജ്മെന്റിന്റെ ശ്രദ്ധയില്പ്പെടുത്തിയിട്ടും നടപടിയുണ്ടായിട്ടില്ല. കോളജ് കാമ്പസില് അനധികൃതമായി കെട്ടിടങ്ങള് നിര്മ്മിക്കുകയും സര്ക്കാരിലേക്ക് അടക്കേണ്ടുന്ന നികുതി അടക്കാതെയും മാനേജ്മെന്റ് ധിക്കാരപരമായ നടപടിയാണ് സ്വീകരിക്കുന്നത്.
ചരിത്രത്തിലിടംനേടിയ അഞ്ചരക്കണ്ടി കറപ്പത്തോട്ടം നശിപ്പിച്ചാണ് കെട്ടിടങ്ങള് നിര്മ്മിച്ചിട്ടുള്ളത്. ഇതുകൂടാതെ നൂറ്റമ്പതോളം വിദ്യാര്ത്ഥികളുടെ ഭാവി തുലച്ച കോളജ് അധികൃതര്ക്കെതിരെ ശക്തമായ നടപടി സ്വീകരിക്കണമന്നും ആവശ്യപ്പെട്ടാണ് ബഹുജന മാര്ച്ച് നടത്തുന്നത്. ബിജെപി നടത്തുന്ന നാലാംഘട്ട സമരമാണ് ഇതെന്നും ഭാരവാഹികള് അറിയിച്ചു. വാര്ത്താസമ്മേളനത്തില് ബിജെപി ധര്മ്മടം മണ്ഡലം പ്രസിഡണ്ട് പി.ആര്.രാജന്, ജനറല് സെക്രട്ടറി കെ.പി.ഹരീഷ് ബാബു, വൈസ് പ്രസിഡണ്ട് പി.സതീശന്, അഞ്ചരക്കണ്ടി പഞ്ചായത്ത് ജനറല് സെക്രട്ടറി ഐ.കെ.ജിതേഷ് തുടങ്ങിയവര് പങ്കെടുത്തു.
