കണ്ണൂര്: സിപിഎം കീഴാറ്റൂര് സമരത്തെ എതിര്ക്കുന്നത് ചരിത്ര ബോധമില്ലാത്തതിനാലാണെന്നും പാര്ട്ടി ആത്മപരിശോധന നടത്താന് തയ്യാറാകണമെന്നും ഈ ചരിത്ര ബോധമില്ലായ്മ സിപിഎമ്മിനെ സമീപഭാവിയില് കേരളത്തില് നിന്നും പുറംതളളുന്നതിന് വഴിയൊരുക്കുമെന്നും ബിജെപി മുന് സംസ്ഥാന അധ്യക്ഷന് സി.കെ.പത്മാനഭന് പറഞ്ഞു. ബിജെപി കണ്ണൂര് ജില്ലാ കമ്മറ്റിയുടെ നേതൃത്വത്തില് ‘കീഴടങ്ങില്ല കീഴാറ്റൂര്’ എന്ന പേരില് ഇന്നലെ നടത്തിയ കര്ഷകരക്ഷാ മാര്ച്ചിന്റെ സമാപന സമ്മേളനം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. സിപിഎം എങ്ങിനെ സിപിഎമ്മായിയെന്ന കാര്യം പോലും പാര്ട്ടിയുടെ പുതിയ നേതൃത്വം വിസ്മരിക്കുകയാണ്. പുതിയ നേതൃത്വത്തിന് കോര്പ്പറേറ്റ് ശക്തികളോടാണ് വിധേയത്വമെന്നും കര്ഷക തൊഴിലാളികളെ മറന്നു കഴിഞ്ഞുവെന്നും അദ്ദേഹം പറഞ്ഞു.
നല്ല വായു ശ്വസിക്കാന്, നല്ല വെള്ളം കുടിക്കാന് പച്ചയായ മനുഷ്യനെകാണാന് കീഴാറ്റൂരില് പോകണം. ചെങ്കോട്ടയിലേക്ക് സ്വാഗതം എന്ന് പറഞ്ഞ് കൊടി ഉയര്ത്തുന്ന സി.പി.എം യഥാര്ത്ഥ ചെങ്കോട്ടയില് കൊടി ഉയര്ത്താന് രാഷ്ട്രീയ വളര്ച്ച എത്തിയിട്ടില്ലാത്ത പാര്ട്ടിയാണ്. കേരളത്തിലെങ്കിലും സിപിഎം പച്ചപിടിച്ചത് കര്ഷകരുടെ സഹായത്തോടെയാണ് ആ കര്ഷകരെയും കൃഷിഭൂമിയെയും മറന്നുകൊണ്ട് കോര്പ്പറേറ്റ് മുതലാളിമാര്ക്ക് കൃഷിഭൂമിയും കര്ഷകരെയും അടിയറ വെക്കുന്ന നയമാണ് സിപിഎം ഇന്ന് സ്വീകരിക്കുന്നത്. കൃഷി ഭൂമിയുടെ വില ശാസ്ത്രീയമായി നിര്ണയിക്കാന് സാധിക്കില്ല. 17 തരത്തിലുള്ള സേവനങ്ങള് നെല്പ്പാടങ്ങള് നമുക്ക് നല്കുന്നുണ്ട് എന്നാണ് പഠനങ്ങള് പറയുന്നത്. പിണറായി സര്ക്കാര് ജനകീയ വിഷങ്ങള്ക്കെതിരെ ധിക്കാരപരമായ നടപടികളാണ് സ്വീകരിച്ചു വരുന്നത്. തളിപ്പറമ്പില് നിലവിലുള്ള ദേശീയപാത ആവശ്യമായ നഷ്ടപരിഹാരം നല്കികൊണ്ട് വികസിപ്പിക്കാന് സിപിഎം നേതൃത്വം നല്കുന്ന സംസ്ഥാന സര്ക്കാര് തയ്യാറാകണം.
ശാസ്ത്രസാഹിത്യ പരിഷത്തിന്റെ നിര്ദ്ദേശങ്ങള് എന്തുകൊണ്ട് മുഖവിലക്കെടുക്കുന്നില്ല. പകൃതിയെ വന്ദിച്ചില്ലെങ്കിലും നിന്ദിക്കരുത് .കൃഷിഭൂമിയെ കര്ഷകരെയും വഞ്ചിക്കുന്ന സിപിഎം ആത്മപരിശോധന നടത്തണമെന്നുംഅദ്ദേഹം പറഞ്ഞു. ചടങ്ങില് ബിജെപി ജില്ലാ പ്രിസഡണ്ട് പി.സത്യപ്രകാശ് അധ്യക്ഷത വഹിച്ചു. ജാഥാ നായകന് ബിജെപി ദേശീയ നിര്വ്വാഹക സമിതിയംഗം പി.കെ.കൃഷ്ണദാസ്, സംസ്ഥാന ജനറല് സെക്രട്ടറി എം.ടി.രമേഷ്, സെക്രട്ടറി അഡ്വ.ബി.ഗോപാലകൃഷ്ണന്, സംസ്ഥാന സെല് കോഡിനേറ്റര് കെ.രഞ്ചിത്ത്, മേഖലാ വൈസ് പ്രസിഡണ്ട് എ.പി.ഗംഗാധരന്, ജില്ലാ ജനറല് സെക്രട്ടറിമാരായ കെ.കെ.വിനോദ് കുമാര്, അഡ്വ.വി.രത്നാകരന്, ആനിയമ്മ രാജേന്ദ്രന്, എന്.രതി, കെ.രാധാകൃഷ്ണന്, ബാലകൃഷ്ണന് പടപ്പേങ്ങാട്, യുവമോര്ച്ച സംസ്ഥാന വൈസ് പ്രസിഡണ്ട് ബിജു ഏളക്കുഴി, സംസ്ഥാന സെക്രട്ടറി കെ.പി.അരുണ്കുമാര്, യുവമോര്ച്ച ജില്ലാ പ്രസിഡണ്ട് സി.സി.രതീഷ്, ഒബിസി മോര്ച്ച ജില്ലാ പ്രസിഡണ്ട് എം.കെ.വിനോദ്, കര്ഷക മോര്ച്ച ജില്ലാ പ്രസിഡണ്ട് ടി.സി.മനോജ് തുടങ്ങിയവര് സമാപന പരിപാടിയില് സംബന്ധിച്ചു.
