കോട്ടയം: ക്രൈസ്തവ സഭകളില് തുല്യനീതിക്ക് വേണ്ടി ഉയരുന്ന മുറവിളിക്ക് ശക്തിപകര്ന്ന് ദേവാലയത്തിന് പുറത്ത് സ്ത്രീകള്ക്ക് കാല്കഴുകല് ശുശ്രൂഷ. പെസഹ വ്യാഴത്തിനോട് അനുബന്ധിച്ച് പുരോഹിതന്മാരുടെ മുഖ്യകാര്മികത്വത്തില് നടക്കുന്ന ശുശ്രൂഷയാണ് അള്ത്താരയ്ക്ക് പുറത്തേക്ക് എത്തിച്ചത്.
സഭയ്ക്കുള്ളില് നവീകരണത്തിന് വേണ്ടി വാദിക്കുന്ന ഇന്ത്യന് ക്രിസ്ത്യന് വിമണ്സ് മൂവ്മെന്റിന്റെ നേതൃത്വത്തിലാണ് കാല്കഴുകല് ശുശ്രൂഷാ ചടങ്ങുകള്ക്ക് പുതിയ മാനം കൊടുത്തത്. കോട്ടയത്തെ നവജീവന്ട്രസ്റ്റില് നടന്ന ചടങ്ങില് ദമ്പതികളില് ഭര്ത്താവ് ഭാര്യയുടെ കാല്കഴുകി മുത്തമിട്ടാണ് മാറ്റത്തിന് വഴിതെളിച്ചത്. അവിടുത്തെ അന്തേവാസികളായ സ്ത്രീകളുടെയും കാല്കഴുകല് ശുശ്രൂഷാ നടത്തി.
കാല്കഴുകല് ശുശ്രൂഷയിലൂടെ അന്യോന്യമുള്ള ശുശ്രൂഷാ മനോഭാവമാണ് വളരേണ്ടതെന്നും ഇതില് ലിംഗ, സാമ്പത്തിക വിവേചനങ്ങള് പാടില്ലെന്നും ഐസിഡബ്ലൂഎം വിശ്വസിക്കുന്നതായി സെക്രട്ടറി ശാന്തി മത്തായി പറഞ്ഞു.
സഭകളിലെ പുരുഷ, പുരോഹിത മേധാവിത്വങ്ങള് മൂലം സ്ത്രീകളെ നൂറ്റാണ്ടുകളായി കാല്കഴുകല് ശുശ്രൂഷ ചടങ്ങുകളില്നിന്ന് മാറ്റി നിര്ത്തിയിരിക്കുകയാണ്. പുരോഹിതന്മാരുടെ നേതൃത്വത്തില് നടക്കുന്ന ശുശ്രൂഷകളില് പുരുഷന്മാര്ക്കാണ് സ്ഥാനം. ഇതിന് മാറ്റം വേണമെന്ന് പോപ്പിന്റെ കല്പ്പന ഉണ്ടായിരുന്നുവെങ്കിലും ഭാരതീയ സഭകളില് ഇപ്പോഴും ലിംഗവിവേചനം തുടരുകയാണ്.
എല്ലാവരും തുല്യരാണെന്ന സന്ദേശം എത്തിക്കുകയാണ് ഇത്തരമൊരു ചടങ്ങിലൂടെ ഐസിഡബ്യൂഎം ലക്ഷ്യമിടുന്നത്. സ്ഥാനങ്ങളും മാനദണ്ഡങ്ങളും ഉച്ചനീചത്വങ്ങളും പരിപാവനമെന്ന് വിശ്വസിക്കുന്ന ഈ ചടങ്ങിന് ബാധകമല്ല. ഒരാളുടെ കാല്കഴുകി മുത്തമിടുമ്പോള് ഉള്ളില്ത്തന്നെ എളിമയും സംതൃപ്തിയും ഉണ്ടാകുമെന്നും ഇവര് കരുതുന്നു. പെസഹ വ്യാഴത്തിന് തലേദിവസം നടന്ന ചടങ്ങ് കോട്ടയത്തും തിരുവല്ലയിലും നടത്തി.
