തിരുവനന്തപുരം: ക്ഷേത്രങ്ങളെ തകര്ക്കാന് ലക്ഷ്യമിട്ട് സിപിഎമ്മിന്റെ സ്വകാര്യബില്. പാര്ട്ടിയുടെ നിര്ദ്ദേശ പ്രകാരം ടി.വി. രാജേഷാണ് നിയമസഭയില് സ്വകാര്യ ബില് അവതരിപ്പിച്ചത്. ഹൈന്ദവ സംഘടനകളുടെ പ്രവര്ത്തനം തടയുന്നത് ലക്ഷ്യമാക്കി അവതരിപ്പിച്ച ബില് ഭാവിയില് ക്ഷേത്രങ്ങളെയാകെ തകര്ക്കുന്ന തരത്തിലാണ്.
ജീവനക്കാരുടെ യൂണിയനുകള് മാത്രം ക്ഷേത്രങ്ങളില് പ്രവര്ത്തിച്ചാല് മതിയെന്നാണ് പ്രധാന വ്യവസ്ഥ. ക്ഷേത്രങ്ങള്ക്ക് സമീപം ഹൈന്ദവ സംഘടനകളുടെ പ്രവര്ത്തനമോ ഓഫീസോ പാടില്ല. ആരാധനാലയങ്ങള്ക്ക് സമീപം സംഘം ചേരാനോ സംഘടനാ പ്രവര്ത്തനമോ പാടില്ല. അങ്ങനെ സംഘം ചേര്ന്നാല് വിശ്വാസികള്ക്കോ ഏതൊരാള്ക്കുമോ പോലീസില് രേഖാമൂലമോ, അല്ലാതെയോ പരാതിപ്പെടാം. ബന്ധപ്പെട്ട ഉദ്യോഗസ്ഥന് അന്വേഷിച്ച് നടപടിയെടുക്കാതെ അധികാരം ദുര്വിനിയോഗം ചെയ്യുകയാണെങ്കില് ഉദ്യോഗസ്ഥനെ ഒരു വര്ഷംവരെ തടവിന് ശിക്ഷിക്കണം; പതിനായിരം രൂപ പിഴ ഈടാക്കണം- ബില്ലില് പറയുന്നു.
മതസൗഹാര്ദ്ദം തകര്ക്കുന്ന തരത്തില് ആരാധനാലയങ്ങളെ ഉപയോഗപ്പെടുത്തുന്നത് തടയാനാണ് നിയമനിര്മ്മാണമെന്ന് ബില്ലില് പറയുന്നു. ആരാധനാലയങ്ങളെ മറയാക്കി സംരക്ഷണ സമിതികളും ഓഫീസും ഉണ്ടാക്കി പ്രവര്ത്തിച്ചു വരുന്നത് തടയണമെന്നും വ്യവസ്ഥ ചെയ്യുന്നു.
നിലവില് നിയമമുണ്ടെന്ന് മന്ത്രി കടകംപള്ളി സുരേന്ദ്രന് മറുപടി പറഞ്ഞു. എന്നാല് ബില്ലില് ഉറച്ച് നില്ക്കുന്നതിനാല് ചര്ച്ചയ്ക്കായി ബില് മാറ്റി വച്ചു.
കൃഷ്ണഭക്തിക്കാര് ആര്എസ്എസില് എത്തുന്നു
വിശ്വാസികളെ വഴിതെറ്റിക്കാന് ആര്എസ്എസ് ഉണ്ടാക്കിയ ക്ഷേത്ര സംരക്ഷണ സമിതി, വിശ്വഹിന്ദു പരിഷത് തുടങ്ങിയ സംഘടനകള് വ്യക്തമായ വര്ഗ്ഗീയ വിദ്വേഷം ഉണ്ടാക്കുകയാണെന്ന് ബില് അവതരിപ്പിച്ച് ടി.വി. രാജേഷ് പറഞ്ഞു. ക്ഷേത്രങ്ങളില് ആയുധപരിശീലനം നടത്താന് കേന്ദ്രമന്ത്രിമാര് നേതൃത്വം നല്കുന്നു. ക്ഷേത്ര സംരക്ഷണ സമിതി മുന്നോട്ട് വയ്ക്കുന്നത് ഭീകരതയുടെ നിലപാടാണ്. നിയമവിധേയമായതും അല്ലാത്തതുമായ പണം ഒഴുകിയെത്തുന്ന ന്യൂന പക്ഷങ്ങള്ക്കിടയില് മത രാഷ്ട്രീയം വളര്ന്നു വരുന്നു.
ആര്എസ്എസ് വര്ഗ്ഗീയ കലാപങ്ങള് സംഘടിപ്പിച്ചിട്ടുളള സംഘടനയാണ്. ശ്രീകൃഷ്ണ ജയന്തി രാഷ്ട്രീയ അടിസ്ഥാനത്തില് നടത്തിയ സാഹചര്യം ശ്രദ്ധയില്പെട്ടിട്ടുണ്ടോയെന്ന് പി.ടി. തോമസ് ചോദിച്ചപ്പോള് ശോഭായാത്ര വര്ഗ്ഗീയത കുത്തി വയ്ക്കാനാണെന്നു പറഞ്ഞത് വി.ടി. ബല്റാം ആണെന്ന് ടി.വി. രാജേഷ് മറുപടി നല്കി. കൃഷ്ണഭക്തിയുള്ള കുടുംബങ്ങളില് നിന്ന് കുട്ടികളെ ആര്എസ്എസിലെത്തിക്കാന് ശ്രമം നടക്കുന്നെന്ന് എ.എന്. ഷംസീര് പറഞ്ഞു.
മറ്റ് മതസ്ഥാപനങ്ങളെ സംബന്ധിച്ച് പരാമര്ശമില്ല
ടി.വി. രാജേഷിന്റ സ്വകാര്യബില്ലില് ക്ഷേത്രങ്ങളെ കടന്നാക്രമിക്കുമ്പോള് മറ്റ് മതസ്ഥാപനങ്ങളെ സംബന്ധിച്ച് പരാമര്ശമില്ല. അവ നിലവിലെ അവരുടെ ഭരണ സംവിധാനം ഉപയോഗിച്ച് പ്രവര്ത്തിക്കുന്നു. അവര് ആരാധനാലയങ്ങള് കേന്ദ്രീകരിച്ച് സംഘടിക്കുന്നത് സംബന്ധിച്ചും പരാമര്ശമില്ല.
