കോട്ടയം: കൊടിയുടെ നിറവും രാഷ്ട്രീയവും എന്തുമാകട്ടെ തിരുനക്കരയപ്പന്റെ ആറാട്ട് ആഘോഷമാക്കുകയാണ് തിരുനക്കര ടൂറിസ്റ്റ് ടാക്സി ഡ്രൈവേഴ്സ് യൂണിയന്.
ആറാട്ടിന് ഉജ്വലമായ സ്വീകരണമാണ് തിരുനക്കര പഴയ ബസ്സ്സ്റ്റാന്റില് തയ്യാറാക്കിയിരിക്കുന്നത്. ബിഎംഎസ്, സിഐറ്റിയു, ഐഎന്ടിയുസി എന്നീ തൊഴിലാളി യൂണിയന്റെ സംയുക്ത കമ്മിറ്റിയുടെ നേതൃത്വത്തിലാണ് ആറാട്ട് സ്വീകരണം നടക്കുന്നത്. 150 ഓളം പറ വഴിപാടാണ് ആറാട്ട് വരവേല്പ്പിനോട് അനുബന്ധിച്ച് നടക്കുന്നത്. 200 ഓളം വാഹനങ്ങളും 250 ഓളം ഡ്രൈവര്മാരുമാണ് തിരുനക്കര പഴയ ബസ്സ്സ്റ്റാന്റിലെ ടാക്സി സ്റ്റാന്റില് നിലവില് ഉള്ളത്. 2004 മുതല് സംയുക്ത തൊഴിലാളി യൂണിയന്റെ നേതൃത്വത്തില് ആറാട്ടിന് വരവേല്പ്പ് നല്കുന്നുണ്ട്.
ഉണ്ണികൃഷ്ണന് മറ്റക്കര, ജോണ് കുരുവിള, പി.ആര്. മുരളീധരന്, എസ്.വി. ജയകുമാര്, റ്റി.ജെ.ജോയി, സുരേഷ്.എ.ഡി, കെ.പി.രാജന് എന്നിവരുടെ നേതൃത്വത്തിലാണ് ആറാട്ട് വരവേല്പ്പ് നടക്കുന്നത്.
