ആലപ്പുഴ: ലൈസന്സ് ഇല്ലാതെ പടക്കം സൂക്ഷിക്കാനും മുന്കൂര് അനുമതി നേടാതെ വെടിക്കെട്ട് നടത്താനും അനുവദിക്കില്ലെന്ന് ജില്ല കളക്ടര് ടി.വി.അനുപമ അറിയിച്ചു. നിര്ദ്ദേശങ്ങള് പാലിയ്ക്കാത്തവര്ക്കെതിരെ കര്ശന നടപടിയെടുക്കും. വെടിക്കെട്ടുകള്ക്ക് ജില്ല മജിസ്ട്രേറ്റായ കളക്ടറുടെ അനുമതി ഉത്സവ നടത്തിപ്പുകാര് മുന്കൂട്ടി വാങ്ങിയിരിക്കണമെന്ന് ഉത്തരവില് പറയുന്നു.
പടക്ക നിര്മ്മാണ ലൈസന്സ് ഉള്ളവരില് നിന്ന് നേരിട്ടാണ് പടക്കങ്ങള് വാങ്ങേണ്ടത്. വെടിക്കെട്ടു സ്ഥലത്ത് പടക്കങ്ങള് നിര്മ്മിക്കാന് പാടില്ല. കാഴ്ചക്കാര്ക്കും വെടിക്കെട്ട് സ്ഥലത്തിനുമിടയില് 100 മീറ്റര് അകലം ഉണ്ടായിരിക്കണം. ആശുപത്രികള്, സ്കൂളുകള് എന്നിവയില് നിന്ന് 250 മീറ്റര് അകലം പാലിക്കണം. പൊട്ടാസ്യം ക്ലോറൈറ്റ്, മറ്റ് നിരോധിത സ്ഫോടക വസ്തുക്കള് അടങ്ങിയ പടക്കങ്ങള് വെടിക്കെട്ടിനുപയോഗിക്കാന് പാടില്ലെന്നും ഉത്തരവില് പറയുന്നു.
അഗ്നിശമനരക്ഷ വിഭാഗത്തിന്റെ സഹകരണത്തോടെ ആവശ്യമായ അഗ്നിശമന ഉപകരണങ്ങളും പ്രാഥമിക ശ്രുശ്രൂഷയും ഉല്സവ നടത്തിപ്പുകാര് ഉറപ്പു വരുത്തണം. കഠിന ശബ്ദം സൃഷ്ടിക്കുന്ന പടക്കങ്ങളുടെ ഉപയോഗം നിരോധിച്ചിട്ടുള്ളതാണ്. സ്ഥലത്തിന്റെ നാലു മീറ്റര് ദൂരത്ത് പടക്കശബ്ദത്തിന്റെ അളവ് 125 ഡെസിബെല് ആയിരിക്കണം. രാത്രി 10നു ശേഷം ശബ്ദപടക്കങ്ങള് ഉപയോഗിക്കാന് പാടില്ലെന്നും നിയമമുണ്ട്.
