ആലപ്പുഴ: സംസ്ഥാനം ഭരിക്കുന്ന സിപിഎം ശത്രുവിനെ നിശ്ചയിച്ച് ഉന്മൂലനം ചെയ്യുകയാണെന്ന് ബിജെപി സംസ്ഥാന ജനറല് സെക്രട്ടറി എം.ടി. രമേശ്. ഇന്ന് നടക്കുന്ന അക്രമങ്ങള്ക്ക് കാരണവുമിതാണ്. സമാധാനയോഗങ്ങള് സിപിഎമ്മിനെ സംബന്ധിച്ച് വെറും പ്രഹസനമാണ്. സമാധാനം നിലനില്ക്കണമെന്നാഗ്രഹിക്കാത്ത പാര്ട്ടിയാണ് കമ്യൂണിസ്റ്റ് പാര്ട്ടി. ഇവരില് നിന്നും സംരക്ഷണം പ്രതീക്ഷിക്കേണ്ടതില്ല. ദീനദയാല്ജി അനുസ്മരണ, നിധി സമര്പ്പണച്ചടങ്ങില് അനുസ്മരണ പ്രഭാഷണം നടത്തുകയായിരുന്നു അദ്ദേഹം.
ബിജെപിക്ക് രാഷ്ട്രീയ എതിരാളികള് മാത്രമേയുള്ളൂ, ശത്രുക്കളില്ല. എതിരാളികളെ പരാജയപ്പെടുത്തും, ഉന്മൂലനം ചെയ്യില്ല. ഇതാണ് രാഷ്ട്രീയ മര്യാദ. ഇതു പിന്തുടരാന് സിപിഎമ്മിനാവില്ല. ഉന്മൂലന സിദ്ധാന്തത്തിന്റെ ആള്ക്കാരാണവര്. അതുകൊണ്ടാണ് കമ്യൂണിസം ലോകത്തുനിന്ന് അപ്രത്യക്ഷമായിക്കൊണ്ടിരിക്കുന്നത്. ത്രിപുരയിലും കേരളത്തിലും മാത്രമുള്ള പാര്ട്ടി അധികകാലമുണ്ടാകില്ലെന്നും അദ്ദേഹം പറഞ്ഞു.
ദീനദയാല്ജി എന്ന ദാര്ശനികനെ മനസ്സിലാക്കാന് പുതിയ തലമുറ പരാജയപ്പെട്ടു. ചരിത്രത്തില് ചാലകശക്തികളായി മാറിയ പല പൂര്വ്വികരെയും വിസ്മരിച്ചു. ദീനദയാല്ജിയെപ്പോലെ സര്ദാര് വല്ലഭായിപട്ടേലും, ശ്യാമപ്രസാദ് മുഖര്ജിയും വിസ്മരിച്ചവരില്പെടും. ദീനദയാല്ജി കാണിച്ച വഴിയിലൂടെയാണ് ബിജെപി പ്രവര്ത്തിക്കുന്നത്. ഭാരതീയ ദര്ശനം ലോകം ഇന്നുനേരിടുന്ന പ്രതിസന്ധിക്ക് ഏക പരിഹാരമെന്ന അദ്ദേഹത്തിന്റെ ചിന്താധാര ഇന്ന് ലോകം അംഗീകരിച്ചിരിക്കുന്നു.
മറ്റുള്ളരാജ്യങ്ങള് ഇന്ന് ഭാരതത്തെ ഉറ്റുനോക്കുകയാണ്. യഥാര്ത്ഥ ബോദ്ധ്യം ഉള്ക്കൊണ്ടുകൊണ്ടാണ് ബിജെപി പ്രവര്ത്തിക്കുന്നത്. ദരിദ്രവിഭാഗത്തില്പ്പെട്ട അമ്പതുകോടി ജനങ്ങള്ക്കുള്ള ആരോഗ്യ പദ്ധതിയായ മോദി കെയറും പാചക വാതകം, ശൗചാലയം, വീട്, വൈദ്യുതി എന്നിവ കേന്ദ്രസര്ക്കാര് നല്കുന്നത് വരിയിലെ അവസാനത്തെ ആള്ക്കും പ്രയോജനം ലഭിക്കത്തക്ക രീതിയിലാണ് നടപ്പാക്കുന്നതെന്നും രമേശ് പറഞ്ഞു.
ജില്ലാ പ്രസിഡന്റ് കെ. സോമന് അദ്ധ്യക്ഷനായി. ജന. സെക്രട്ടറിമാരായ ഡി. അശ്വനിദേവ് സ്വാഗതവും എം.വി. ഗോപകുമാര് നന്ദിയും പറഞ്ഞു.
