ന്യൂദല്ഹി: പത്താം ക്ലാസ് പരീക്ഷയാണ് വരുന്നത്, നന്നായി പഠിക്കണം… കഴിഞ്ഞ ദിവസം ഫോണ് ചെയ്തപ്പോള് അച്ഛന് ഇതാണ് എന്നോട് അവസാനമായി പറഞ്ഞത്, അഭിനന്ദന്റെ വാക്കുകള് ഇടറി.
അതിര്ത്തിയില് പാക് സൈന്യത്തിന്റെ വെടിവെപ്പില് വീരമൃത്യു വരിച്ച ഹവില്ദാര് റോഷന് ലാലിന്റെ മകനാണ് അഭിനന്ദന്. സാംബയിലെ സൈനിക സ്കൂളിലെ പത്താം ക്ലാസ് വിദ്യാര്ഥി. അനുജത്തി അര്ഥിക അതേ സ്കൂളില് എട്ടാം ക്ലാസില് പഠിക്കുന്നു.
നിയന്ത്രണ രേഖയിലെ രജൗരി സെക്ടറില് പാക് വെടിവെപ്പില് കഴിഞ്ഞ ദിവസം നാല്പ്പത്തിരണ്ടുകാരനായ റോഷന് ലാല് അടക്കം നാലു സൈനികരാണ് വീരമൃത്യു വരിച്ചത്. ക്യാപ്റ്റന് കപില് കുന്ഡു, റൈഫിള്മാന്മാരായ ശുഭം സിങ്, രാമാവതാര് എന്നിവരാണ് മറ്റുള്ളവര്.
സാംബ ജില്ലയിലെ നിച്ല ഗ്രാമത്തില് നിന്നുള്ള റോഷന് ലാലിന്റെ കുടുംബത്തില് പലരും െൈസനികരാണ്. മൂത്ത സഹോദരന് ദര്ശന് കുമാര് സിഐഎസ്എഫിലെ ഉദ്യോഗസ്ഥനാണ്. മരിക്കുന്നതിനു മുമ്പ് പാക് സൈന്യത്തിന് തന്റെ സഹോദരന് കനത്ത നാശം വരുത്തിയിട്ടുണ്ടെന്നു തനിക്കുറപ്പാണെന്ന് ദര്ശന് പറയുന്നു. എത്രയും വേഗം തിരിച്ചടിക്കണം. ഇനി പാക്കിസ്ഥാനു മറുപടി നല്കുകയല്ല വേണ്ടത്. ഇത് എത്രയും പെട്ടെന്ന് അവസാനിപ്പിണം, ദര്ശന്റെ വാക്കുകളില് രോഷം.
പിറന്നാള് ആഘോഷത്തിനു കാത്തുനില്ക്കാതെയാണ് ക്യാപ്റ്റന് കപില് കുന്ഡുവിന്റെ അന്ത്യയാത്ര. ആറു ദിവസം കഴിഞ്ഞാല് കപിലിന്റെ ഇരുപത്തിമൂന്നാം പിറന്നാളാണ്. ഗുഡ്ഗാവ് ജില്ലയിലെ രന്സിക ഗ്രാമത്തിലാണ് കപിലിന്റെ വീട്.
കഴിഞ്ഞ ആഴ്ചകളില് തുടര്ച്ചയായി പാക്കിസ്ഥാന് അതിര്ത്തിയില് കനത്ത വെടിവെപ്പു തുടരുകയാണ്. ഇന്ത്യ ശക്തമായി തിരിച്ചടിക്കുന്നുണ്ട്. കഴിഞ്ഞ രണ്ടു മാസത്തിനിടെ ഇന്ത്യയുടെ പന്ത്രണ്ടു സൈനികരാണ് വീരമൃത്യു വരിച്ചത്.
