അല്ല! നിര്‍ഗുണ ബ്രഹ്‌മോപാസകന്മാരെ അപേക്ഷിച്ച്, എന്നെ നേരിട്ട് ഉപാസിക്കുന്ന ഭക്തന്മാര്‍ക്ക് മഹത്വം കൂടുതലുണ്ട്. അത് മനസ്സിലാവണമെങ്കില്‍, നിര്‍ഗുണ ബ്രഹ്‌മോപാസകന്മാരുടെ ഉപാസനാ സമ്പ്രദായം ആദ്യം മനസിലാക്കണം; ശ്രദ്ധിക്കൂ! പറയാം-
അവര്‍ ഉപാസിക്കുന്നത് അക്ഷരത്തെയാണ്. എന്താണ് അക്ഷരം? ക്ഷരം (നാശ) ഇല്ലാത്തത്- നാശമില്ലാത്തത് ബ്രഹ്മത്തിനു മാത്രമാണ്.
”അക്ഷരം ബ്രഹ്മപരമാ” എന്ന് ഞാന്‍ മുമ്പേ പറഞ്ഞിട്ടുണ്ടല്ലോ (8-3). അക്ഷരം എന്ന പദത്തിന് പര്രബഹ്മം എന്നുതന്നെയാണ് അര്‍ത്ഥം.
തേ മാം പ്രാപ്‌നുവന്തി ഏവ- ആ ബ്രഹ്‌മോപാസകന്മാര്‍ എന്നെ പ്രാപിക്കുകതന്നെ ചെയ്യും; സംശയമില്ല.
പക്ഷേ ബ്രഹ്മം ‘അനിര്‍ദ്ദേശ്യം’- വാക്കുകള്‍കൊണ്ട് വിവരിക്കാന്‍ കഴിയാത്തതാണ്. ”യ തോവാചോ നിവര്‍ത്തന്തേ”എന്നാണ് വേദവചനം.
(= വാക്കുകള്‍ ബ്രഹ്മഭാവത്തെ വിവരിക്കാന്‍ കഴിയാതെ പിന്‍മാറുന്നു) എന്തുകൊണ്ടാണ് പിന്മാറേണ്ടിവന്നതെന്ന് പറയുന്നു- ‘അവ്യക്തം’. ജാതി, ഗുണം, പ്രവൃത്തി എന്നീ വസ്തുക്കളെ ആശ്രയിച്ചാണ് വാക്കുകള്‍ പ്രവര്‍ത്തിക്കുന്നത്. ബ്രഹ്മത്തിന് ഇവ ഒന്നും ഇല്ല. എന്തുകൊണ്ടാണ് ജാത്യാദി ഗുണങ്ങള്‍ ബ്രഹ്മത്തിനില്ലാത്തത്? ‘സര്‍വത്രഗം’- എല്ലായിടത്തും വ്യാപിച്ചുനില്‍ക്കുന്നു. സകല ശരീരങ്ങളിലും വസ്തുക്കളിലും വ്യാപിച്ചുനില്‍ക്കുന്നു. മേല്‍പ്പറഞ്ഞ കാരണങ്ങള്‍കൊണ്ട് ബ്രഹ്മം അചിന്ത്യം എന്നു പറയപ്പെടുന്നു. മനസ്സിന്റെ പ്രവൃത്തിയായ വിചാരത്തില്‍നിന്നും ബ്രഹ്മം വിഷയമല്ല. ഇതും വേദത്തില്‍ പറഞ്ഞിട്ടുണ്ട്- ‘അപ്രാപ്യമനസാ സഹനിവര്‍ത്തത്തേ.’
എന്തുകൊണ്ടാണ് ബ്രഹ്മം വിചാരത്തിന് വിഷയമാവാത്തത്?
അതു ‘കൂടസ്ഥം’ ആണ്. ഭൗതികവസ്തുക്കളായ ദേവമനുഷ്യാദി ശരീരങ്ങളിലും, സ്ഥാവരജംഗമ വസ്തുക്കളിലും വ്യാപിച്ചുനില്‍ക്കുന്നുവെങ്കിലും അവയുമായി ഒരു ബന്ധവും ബ്രഹ്മത്തിനില്ല; വികാരവും പരിണാമവും ഇല്ല.
എല്ലാത്തിലും അന്തര്‍നിഹിതമായ ബ്രഹ്മചൈതന്യമാണ് എല്ലാത്തിന്റെയും അസ്തിത്വവും പ്രവര്‍ത്തനവും ഉണ്ടാക്കുന്നത്. ലൗകികന്മാരായ നമുക്ക് അത് അറിയാന്‍ കഴിയുന്നില്ല. ഉദാഹരണമായി കള്ളസാക്ഷി പറയുന്ന വ്യക്തി ‘ഞാന്‍ ആ കൊലപാതകം കണ്ടിട്ടേ ഇല്ല’ എന്നു പറയുന്നു. വാസ്തവത്തില്‍ കൊല നടക്കുന്നത് അയാള്‍ കണ്ടിട്ടുണ്ട്. കോടതിയില്‍ വക്കീല്‍ എന്ത് ചോദിച്ചിട്ടും ആ സത്യാവസ്ഥ പുറത്തുവരുന്നില്ല. സത്യമല്ലാത്ത അവ പുറത്തുവിടുകയും സത്യാവസ്ഥ ഒളിപ്പിച്ചു വയ്‌ക്കുകയും ചെയ്യുന്നതിനെ ‘കൂടം’ എന്ന് വിശേഷിപ്പിക്കാം.
ബ്രഹ്മം എപ്പോഴും കൂടാവസ്ഥയിലാണ്. ഭൗതികാവസ്ഥയില്‍ ഒളിഞ്ഞിരിക്കുന്നു ഇതാണ് കൂടസ്ഥം എന്നതിന് അര്‍ത്ഥം. മാത്രമല്ല, ‘അചലം’ സ്വന്തം സ്വഭാവത്തില്‍നിന്ന് ഒരിക്കലും ഇളകാത്തതുമാണ്. മാത്രമല്ല ബ്രഹ്മം ധ്രുവം- നിത്യസത്യാവസ്ഥയിലുള്ളതാണ്.
മേല്‍പറഞ്ഞ വിധത്തിലുള്ള ബ്രഹ്മത്തെ ബ്രഹ്മവാദികള്‍ ഉപാസിക്കുന്നു.
(ഫോണ്‍: 9961157857)
