കൊല്ലം: സാമ്പത്തിക പ്രതിസന്ധി മൂലം വിവിധ വകുപ്പുകളുടെ കോടിക്കണക്കിനു രൂപയുടെ ബില്ലുകള് മാറുന്നില്ല. കഴിഞ്ഞ ഒക്ടോബറില് പകുതി മുതല് സമര്പ്പിച്ച ബില്ലുകള്ക്ക് ഇതുവരെ ക്ലിയറന്സ് നല്കിയിട്ടില്ല. എന്നാല് സര്ക്കാരിന് പ്രത്യേക താല്പര്യമുള്ള കാര്യങ്ങള്ക്ക് അനുമതി നല്കുന്നുമുണ്ട്.
റവന്യു വകുപ്പിന് മാത്രം 160 കോടി രൂപയുടെ ബില്ലുകള്ക്ക് അനുമതി ലഭിച്ചിട്ടില്ല. സ്ഥലമേറ്റെടുത്തതിന് നഷ്ടപരിഹാരമായി വിവിധ കോടതികള് അനുവദിച്ച നഷ്ടപരിഹാര തുകയാണ് ഇവയിലേറെയും. ഈ തുകകള് അധികൃതര് നേരത്തെ നല്കിയിട്ടുള്ളതാണ്.
ഈ തുക സര്ക്കാര് ട്രഷറി അക്കൗണ്ടുകളിലാണ് നിക്ഷേപിച്ചിരിക്കുന്നത്. ഇവ ട്രഷറികളില് നിന്നും എടുത്ത് അതാത് കോടതികളുടെ ട്രഷറി അക്കൗണ്ടിലേക്ക് മാറ്റണം. ഇത് മാറ്റാനുള്ള അനുമതിയാണ് തടഞ്ഞുവച്ചിരിക്കുന്നത്. സര്ക്കാരിന്റെ സാമ്പത്തിക പ്രതിസന്ധിയില് വലയുന്നത് സാധാരണക്കാരാണ്.
