കണ്ണൂര്: ജില്ലാ ഭരണകൂടത്തെ വെല്ലുവിളിച്ച് പൊതുസ്ഥലങ്ങളില് സിപിഎമ്മിന്റെയും അനുബന്ധ സംഘടനകളുടെയും ചുവരെഴുത്ത്. ജില്ലയില് സമാധാനാന്തരീക്ഷം കൊണ്ടുവരുന്നതിന് ഇലക്ട്രിക്ക് പോസ്റ്റില് ഉള്പ്പടെ പൊതുഇടങ്ങളിലുള്ള രാഷ്ട്രീയ പാര്ട്ടികളുടെ പരസ്യ പ്രചാരണങ്ങള് നിര്ത്തണമെന്ന് കഴിഞ്ഞ ദിവസം നടന്ന ഉഭയകക്ഷി ചര്ച്ചയില് തീരുമാനമെടുത്തിരുന്നു. കലക്റ്ററുടെയും എസ്പിയുടെയും സാന്നിധ്യത്തില് ആര്എസ്എസ്, സിപിഎം നേതാക്കള് ഇതിനോട് യോജിക്കുയും ചെയ്തിരുന്നു. ജില്ലാ ഭരണകൂടം തന്നെ മുന്കയ്യെടുത്ത് ഇലക്ട്രിക്ക് പോസ്റ്റുകളിലുള്ള എഴുത്തുകള് മായ്ച്ച് കളയുമെന്നായിരുന്നു അന്ന് കലക്ടര് വ്യക്തമാക്കിയിരുന്നത്.
എന്നാല് ഇതിന് കടകവിരുദ്ധമായ നിലപാടുകളാണ് ജില്ലാ ഭരണകൂടത്തിന്റെയും സിപിഎം നേതൃത്വത്തിന്റെയും ഭാഗത്തുനിന്നുണ്ടാകുന്നത്. നേരത്തെ സിപിഎമ്മിന്റെയും പോഷക സംഘടനകളുടെയും പേരുകള് മാത്രമാണ് എഴുതിയിരുന്നതെങ്കില് ഇപ്പോള് പ്രകോപനപരമായ മുദ്രവാക്യങ്ങളും ഇലക്ട്രിക്ക് പോസ്റ്റില് എഴുതിയിട്ടുണ്ട്. കണ്ണൂര് നഗരത്തിനോട് ചേര്ന്ന താളിക്കാവിലും പരിസര പ്രദേശങ്ങളിലും ആര്എസ്എസിനെയും അനുബന്ധ സംഘടനകളെയും പരസ്യമായി വെല്ലുവിളിച്ച് ഇലക്ട്രിക്ക് പോസ്റ്റുകളില് മുദ്രാവാക്യങ്ങള് പ്രത്യക്ഷപ്പെട്ടത് കഴിഞ്ഞ ദിവസമാണ്. ആര്എസ്എസിന് സ്വാധീനമുള്ള പ്രദേശങ്ങളില് പ്രകോപനപരമായ മുദ്രാവാക്യമഴുതി ബോധപൂര്വ്വം സംഘര്ഷമുണ്ടാക്കുകയെന്ന നയത്തിന്റെ ഭാഗമാണ് പുതിയ എഴുത്തിന് പിന്നിലെന്നാണ് സൂചന.
ജില്ലയിലെ പ്രമുഖ വിദ്യാഭ്യാസ സ്ഥാപനങ്ങളുടെ മതിലുകളിലും ചുമരുകളിലും സിപിഎം പോഷക സംഘടനയായ എസ്എഫ്ഐയുടെ ചുവരെഴുത്തുകളാണ്. തോട്ടട ഐടിഐയുടെ മതിലില് എസ്എഫ്ഐയുടെതല്ലാത്ത ചുമരെഴുത്തുകള്ക്ക് സ്ഥാനമില്ല. എസ്എഫ്ഐ മുദ്രാവാക്യത്തോടൊപ്പം പ്രകോപനപരമായ മുദ്രാവാക്യങ്ങളും ഇവിടെ കാണാം. തങ്ങള്ക്ക് നേരെ വന്നാല് നട്ടെല്ലൂരി ചെങ്കൊടി നാട്ടുമെന്ന അത്യന്തം പ്രകോപനപരമായ മുദ്രാവാക്യങ്ങളെഴുതിയിട്ടും നടപടിയെടുക്കാന് അധികൃതരും തയ്യാറായിട്ടില്ല. പെരളശ്ശേരിയിലെ സിപിഎം നിയന്ത്രണത്തിലുള്ള സ്കൂളിന്റെ മതിലിലും എസ്എഫ്ഐയുടെ ചുവരെഴുത്തുകളാണ്. സ്കൂളിലന്റെ പ്രധാന കവാടത്തില് പോലും എസ്എഫ്ഐ എന്ന് എഴുതിവെച്ചതായി കാണാം. ഇതിനെതിരെ നടപടിയെടുക്കാന് സ്കൂള് അധികൃതരോ പോലീസോ തയ്യാറാക്കുന്നില്ലെന്നതും ശ്രദ്ധേയമാണ്.
ജില്ലാ ഭരണകൂടമെടുത്ത തീരുമാനപ്രകാരം വളരെ ചുരുങ്ങിയ സ്ഥലങ്ങളില് മാത്രമേ പൊതു സ്ഥലങ്ങളിലുള്ള ചുമരെഴുത്തുകള് മായ്ച്ച് കളഞ്ഞിട്ടുള്ളു. ഇലക്ട്രിക്ക് പോസ്റ്റുകളിലുള്ള സിപിഎമ്മിന്റെ എഴുത്തുകള് മായ്ച്ച് കളയാന് മടിക്കുന്ന പോലീസ് ബിജെപിയുടെ എഴുത്തുകള് തേടിപ്പിടിച്ച് പെയിന്റടിക്കുകയാണ്. സിപിഎം സ്വാധീന കേന്ദ്രങ്ങളില് അധികൃതര്ക്ക് നേരിട്ടെത്തി ചുമരെഴുത്തുകള് നശിപ്പിക്കാന് സാധിക്കില്ലെന്നതാണ് വസ്തുത. ഭരണകൂടത്തിന്റെ നിര്ദ്ദേശത്തെ വെല്ലുവിളിച്ച് പുതിയ സ്ഥലങ്ങളില് എഴുത്തുകള് വ്യാപകമാക്കുന്നത് സ്ഥിതികള് കൂടുതല് സങ്കീര്ണ്ണമാക്കും.
