ന്യൂദല്ഹി: റഗ്ബി പരിശീലനത്തിന്റെ പേരില് ഫ്രാന്സിലേക്ക് ആണ്കുട്ടികളെ കടത്തിയ കേസില് മൂന്ന് മനുഷ്യക്കടത്ത് ഏജന്റുമാരെ സി.ബി.ഐ ചോദ്യം ചെയ്യുന്നു. ദല്ഹി, ഫരീദാബാദ് എന്നിവിടങ്ങില് പ്രവര്ത്തിക്കുന്ന ലളിത് ഡേവിഡ് ഡീന്, സഞ്ജീവ് രാജ്, വരുണ് ചൗധരി എന്നിവരാണ് സി.ബി.ഐ കസ്റ്റഡിയിലുള്ളത്.
2016 ഫെബ്രുവരി ഒന്നിനാണ് സംഭവം. 13നും 18 നും ഇടയില് പ്രായമുള്ള 25 ആണ്കുട്ടികളെ റഗ്ബി പരിശീലനത്തിനെന്ന പേരില് പാരീസിലേക്ക് കടത്തിയെന്നാണ് കേസ്. ഇന്റര്പോള് വിവരം നല്കിയതിനെ തുടര്ന്നാണ് ദല്ഹി സി.ബി.ഐ അന്വേഷണം ആരംഭിച്ചിരിക്കുന്നത്.
പഞ്ചാബ്, ഹരിയാന എന്നിവിടങ്ങളില് നിന്നുമുള്ള ആണ്കുട്ടികളെയാണ് ഫ്രഞ്ച് ഫെഡറേഷന്റെ ക്ഷണം ലഭിച്ചെന്ന് കാണിച്ച് ഫ്രാന്സിലേക്ക് കടത്തിയത്. ഫ്രഞ്ച് ഫെഡറേഷന് ഒരാഴ്ചത്തെ പരിശീലനം നടത്തിയിരുന്നുവെങ്കിലും ഈ കുട്ടികള് പരിശീലനത്തിന് എത്തിയിട്ടില്ലെന്ന് വിവരം ലഭിച്ചു. 25-30 ലക്ഷം രൂപവരെ ഒരു കുട്ടിയുടെ മാതാപിതാക്കളില് നിന്നും ഈടാക്കിയിരുന്നു. ഫ്രാന്സിലെ ഗുരുദ്വാരയിലെത്തിച്ച ഉടന് റിട്ടേണ് ടിക്കറ്റ് ഏജന്റുമാര് ക്യാന്സലാക്കി.
ഏജന്റുമാരുടെ പെരുമാറ്റത്തില് അസ്വാഭാവികത തോന്നിയ രണ്ടു കുട്ടികള് രക്ഷപ്പെട്ടു.ഈ വര്ഷം ഇന്ത്യയിലേക്ക് തിരികെ പോരാന് മതിയായ രേഖകളില്ലാതെ ശ്രമം നടത്തുന്നതിനിടെ ഒരു ആണ്കുട്ടി ഫ്രഞ്ച് പോലീസിന്റെ പിടിയിലായി. കുട്ടിയെ ഇന്റര്പോളില് എത്തിച്ച് വിവരം നല്കിയതിനെ തുടര്ന്നാണ് വിവരം പുറത്തറിയുന്നത്.
ഫ്രഞ്ച് പോലീസ് നല്കിയ വിവരത്തിന്റെ അടിസ്ഥാനത്തില് സി.ബി.ഐ ഏജന്റുമാരുടെ ട്രാവല് ഏജന്സികളില് തിരച്ചില് നടത്തി ലാപ്ടോപ്പുകളും അനുബന്ധ രേഖകളും കണ്ടെടുത്തിട്ടുണ്ട്.
ഇതില് ഒരു കുട്ടിയുടെ പിതാവ് ഏജന്റിനോട് മകനെ യു.എസിലെ ബന്ധുക്കളുടെ അടുത്തേക്ക് അയയ്ക്കണമെന്ന് ആവശ്യപ്പെട്ടിരുന്നു.ഇതിനായി 27 ലക്ഷം രൂപ പിതാവില് നിന്നും വാങ്ങുകയും ചെയ്തു. എന്നാല് മകനെ ഇനിയും തിരികെ ലഭിച്ചിട്ടില്ലെന്ന് പിതാവ് പറഞ്ഞിരുന്നു.
