കണ്ണൂര്: വടക്കേമലബാറിലെ ജനജീവിതത്തിന്റെയും വിശ്വാസത്തിന്റെയും ഭാഗമായ തെയ്യാട്ടവുമായി ബന്ധപ്പെട്ട് പുതിയ പ്രവണതകള് ചര്ച്ച ചെയ്യാന് കാവ്കൂട്ടം സംഘടിപ്പിക്കും. 25ന് രാവിലെ 10 മണിക്ക് കണ്ണൂര് താണയിലെ മാണിക്ക ശ്രീകുരുംബക്കാവ് പരിസരത്ത് നടത്തുന്ന യോഗത്തില് കാവധികാരികളും സ്ഥാനികരും കോലധാരികളും ചേര്ന്നാണ് ഈ വിഷയം ചര്ച്ചാവിധേയമാക്കുന്നത്.
തെയ്യാട്ടസ്ഥാനങ്ങളില് ഭക്ത്യാദരപൂര്വ്വം കെട്ടിയാടുന്ന തെയ്യക്കോലങ്ങളെ സ്റ്റേജിലും പ്രകടനങ്ങളിലും അരങ്ങേറ്റുന്ന പുതിയ പ്രവണതയായിരിക്കും പ്രധാനമായും ചര്ച്ചചെയ്യുക. കാവുകളുടെ തനതായ ആചാരസങ്കല്പങ്ങളില് നിന്ന് വ്യത്യസ്തമായി കാവുകളില് ആവശ്യമില്ലാത്ത വൈദികാചാരരീതികള് അനുഷ്ഠിച്ചുവരുന്നതിനെക്കുറിച്ചും ചര്ച്ച നടക്കും. പുനഃപ്രതിഷ്ഠകളിലൂടെയും പുതിയ പ്രതിഷ്ഠാപനങ്ങളിലൂടെയും കാവുകളിലെ മൂര്ത്തീസങ്കല്പങ്ങള് തന്നെ മാറ്റിമറിക്കുന്നതിലൂടെ നൂറ്റാണ്ടുകളായി നിലനിന്നുപോരുന്ന സവിശേഷമായ ആരാധനാസങ്കല്പങ്ങളെ നഷ്ടപ്പെടുത്തുന്ന സാഹചര്യത്തിലാണ് ഇത്തരമൊരു കൂട്ടായ്മ രൂപം കൊണ്ടതെന്ന് കാവ്കൂട്ടത്തിന്റെ സംഘാടകര് അറിയിച്ചു.
ചിറക്കല് കോവിലകം വലിയരാജ സി.കെ.രവീന്ദ്രവര്മ്മ രാജ ഉദ്ഘാടനം ചെയ്യുന്ന കാവ്കൂട്ടത്തില് കാലിക്കറ്റ് സര്വ്വകലാശാല ഫോക്ലോര് വിഭാഗം മുന് മേധാവി ഡോ.ഇ.കെ.ഗോവിന്ദവര്മ്മ രാജ, ജ്യോതിഷ പണ്ഡിതന് പ്രവീണ് പനോന്നേരി, സിസിആര്ടി സീനിയര് ഫെലോ യു.പി.സന്തോഷ് തുടങ്ങിയവര് പങ്കെടുക്കും.
