കണ്ണൂര്: ബാലാവകാശ സംരക്ഷണ നിയമം, സെബര് നിയമങ്ങള് എന്നിവ സംബന്ധിച്ച് വിവര പൊതുജനസമ്പര്ക്ക വകുപ്പ് മാധ്യമപ്രവര്ത്തകര്ക്കായി ശില്പ്പശാല സംഘടിപ്പിക്കുന്നു. ജില്ലാ ഭരണകൂടം, ജില്ലാ ശിശുസംരക്ഷണ യൂനിറ്റ്, കണ്ണൂര് പ്രസ്സ്ക്ലബ്ബ് എന്നിവയുമായി സഹകരിച്ചാണ് പരിപാടി സംഘടിപ്പിക്കുന്നത്. 27ന് രാവിലെ 9.30 ന് കലക്ടറേറ്റ് അനക്സിലെ പ്ലാനിങ്ങ് കോംപ്ലക്സ് മിനി കോണ്ഫറന്സ് ഹാളില് കണ്ണൂര് സര്വ്വകലാശാല വൈസ് ചാന്സലര് പ്രഫ. ഗോപിനാഥ് രവീന്ദ്രന് ശില്പ്പശാല ഉദ്ഘാടനം ചെയ്യും.
ജില്ലാ കലക്ടര് മീര്മുഹമ്മദലി അധ്യക്ഷത വഹിക്കും. ജില്ലാ പഞ്ചായത്ത് വൈസ് പ്രസിഡണ്ട് പി.പി.ദിവ്യ മുഖ്യാതിഥിയായി പങ്കെടുക്കും. കണ്ണൂര് പ്രസ്സ്ക്ലബ്ബ് സെക്രട്ടറി പ്രശാന്ത് പുത്തലത്ത് സംസാരിക്കും. തുടര്ന്ന് വിവിധ വിഷയങ്ങളില് ക്ലാസുകള് നടക്കും. ബാലാവകാശ നിയമവും മാധ്യമ റിപ്പോര്ട്ടിങ്ങും, കുട്ടികളുടെ അവകാശം സമൂഹത്തിന്റെ ഉത്തരവാദിത്തം, സൈബര് ഫോറന്സിക് അനാലിസിസ് എന്നീ വിഷയങ്ങളില് സബ് ജഡ്ജ് & അസി.സെഷന്സ് ജഡ്ജ് സി സുരേഷ് കുമാര്, ജില്ലാ ചൈല്ഡ് പ്രൊട്ടക്ഷന് ഓഫീസര് അഞ്ജുമോഹന്, തിരുവനന്തപുരം ഫോറന്സിക് സയന്സ് ലബോറട്ടറി അസി. ഡയറക്ടര് ഡോ.സി.പി. സുനില് എന്നിവര് ക്ലാസെടുക്കും.
ബാലാവകാശ നിയമത്തിന്റെ പശ്ചാത്തലത്തില് കുട്ടികള് ഉള്പ്പെടുന്ന കേസുകള് റിപ്പോര്ട്ട് ചെയ്യുമ്പോള് പാലിക്കേണ്ട കാര്യങ്ങളും പൊതുവായ നിയമ അവബോധവുമാണ് ശില്പ്പശാലയിലൂടെ ലക്ഷ്യമാക്കുന്നത്. ജില്ലാ ബ്യൂറോകളിലും ന്യൂസ് ഡസ്ക്കുകളിലും പ്രവര്ത്തിക്കുന്ന മാധ്യമപ്രവര്ത്തകര്ക്കും സ്ഥാപനങ്ങള് നിര്ദേശിക്കുന്ന പ്രാദേശിക ലേഖകര്ക്കും ശില്പ്പശാലയില് പങ്കെടുക്കാവുന്നതാണ്. പങ്കെടുക്കുന്നവര് ഡിസംബര് 23ന് വൈകിട്ട് 5 മണിക്കകം പേര് രജിസ്റ്റര് ചെയ്യണം. ജില്ലാ ഇന്ഫര്മേഷന് ഓഫീസില് 04972 700231 എന്ന നമ്പറിലോ ഇ മെയില് വഴിയോ പേര് രജിസ്റ്റര് ചെയ്യാവുന്നതാണ്.
