കണ്ണൂര്: ജില്ലയിലെ പുഴകളെ മാലിന്യമുക്തമാക്കി സംരക്ഷിക്കാനും അവയുടെ അഴക് വീണ്ടെടുക്കാനും പ്രതിജ്ഞയെടുത്ത് ജില്ലാപഞ്ചായത്തിന്റെ അഴുക്കില് നിന്ന് അഴകിലേക്ക് പദ്ധതിയുടെ ഭാഗമായുള്ള വളപട്ടണം പുഴസമ്മേളനം. വളപട്ടണം പുഴ അടക്കമുള്ള ജില്ലയിലെ പുഴകളെയും ജലസ്രോതസ്സുകളെയും മാലിന്യം നിക്ഷേപിക്കാനുള്ള കേന്ദ്രങ്ങളാക്കാന് അനുവദിക്കില്ലെന്നും അതിനെ ജനകീയമായി ചെറുക്കുമെന്നും സമ്മേളനം പ്രഖ്യാപിച്ചു. ഹരിതകേരളം പദ്ധതിയുടെ ഒന്നാം വാര്ഷികത്തോടനുബന്ധിച്ച് ജില്ലാ പഞ്ചായത്ത് നടപ്പാക്കുന്ന പുഴസസംരക്ഷണ പദ്ധതിയുടെ ജില്ലാതല ഉദ്ഘാടനത്തിന്റെ ഭാഗമായി വളപട്ടണം പാലത്തിനു ചുവട്ടില് നടന്ന പുഴ സമ്മേളനം മന്ത്രി രാമചന്ദ്രന് കടന്നപ്പള്ളി ഉദ്ഘാടനം ചെയ്തു.
പുഴസമ്മേളനത്തില് ജില്ലാ പഞ്ചായത്ത് വൈസ് പ്രസിഡന്റ് പി.പി.ദിവ്യ, എഡി.എം ഇ.മുഹമ്മദ് യൂസുഫ്, സിനിമാ നടന് സന്തോഷ് കീഴാറ്റൂര്, സിനിമാ സംവിധായകന് ഡോ.ബിജു, ജില്ലാ പഞ്ചായത്ത് സ്റ്റാന്റിംഗ് കമ്മിറ്റി അധ്യക്ഷന് കെ.പി.ജയബാലന് മാസ്റ്റര്, ബ്ലോക്ക് പഞ്ചായത്ത് പ്രസിഡന്റുമാരായ കുടുവന് പത്മനാഭന് തുടങ്ങിയവര് പങ്കെടുത്തു.
