കണ്ണൂര്: ഭിന്നശേഷിയുള്ള കുട്ടികളുടെയും ജനിതകമായ രോഗാവസ്ഥകള് നേരിടുന്ന കുഞ്ഞുങ്ങളുടെയും മാതാപിതാക്കള്ക്ക് വേണ്ടിയുള്ള കണ്ണൂര് ഗൈനെക്കോളജി സൊസൈറ്റിയുടെ ബോധവത്കരണ സംരംഭമായ പ്രത്യാശ പരിപാടിക്ക് തുടക്കമായി.
പരിപാടിയുടെ ഔപചാരികമായ ഉദ്ഘാടനം തണല്വീട് ചൈല്ഡ് ഡവലപ്മെന്റ് സെന്ററില് ജില്ലാപോലീസ് മേധാവി ശിവവിക്രം നിര്വഹിച്ചു. നമ്മള് ഓരോരുത്തരും ഭാഗമായ സമൂഹത്തോടുള്ള നമ്മുടെ പ്രതിബദ്ധതയെക്കുറിച്ചും ഇത്തരത്തിലുള്ള ബോധവല്ക്കരണ യജ്ഞങ്ങളുടെ ആവശ്യകതയുടെക്കുറിച്ചും ശിവവിക്രം പ്രതിപാദിച്ചു. ഡോക്ടര്മാര് അവരുടെതിരക്കിട്ട ജീവിതത്തിനിടയിലും സാമൂഹികനന്മക്കുള്ള ഇത്തരം പ്രവര്ത്തനങ്ങള്ക്ക് സമയംകണ്ടെത്തുന്നതിനെ അദ്ദേഹം പ്രത്യേകം അഭിനന്ദിച്ചു. ഇത്തരം യജ്ഞങ്ങള്ക്ക് പോലീസ് സേനയുടെ പരിപൂര്ണ പിന്തുണയും അദ്ദേഹം വാഗ്ദാനം ചെയ്തു.
കണ്ണൂര് ഗൈനെക്കോളജി സൊസൈറ്റിയുടെ സെക്രെട്ടറിയായ ഷൈജസ്നായര് പ്രത്യാശ യുടെ പ്രൊജക്ട് റിപ്പോര്ട്ട് അവതരിപ്പിച്ചു. ഈ സംരഭം വരും ദിവസങ്ങളില് കണ്ണൂര് ജില്ലയിലെയും സമീപ ജില്ലകളിലെയും മറ്റ് റീഹാബിലിറ്റേഷന്സെന്ററുകളിലേക്കും കൂടി വ്യാപിപ്പിക്കാനുള്ള പദ്ധതിയെക്കുറിച്ചും അദ്ദേഹം സദസ്സിനെ അറിയിച്ചു. സൊസൈറ്റി പ്രസിഡന്റ് മിനിബാലകൃഷ്ണന് സ്വാഗതം പറഞ്ഞു. തണല് കണ്ണൂര് ബ്രാഞ്ച് വൈസ് പ്രസിഡന്റ് താജുദ്ധീന്, കണ്ണൂര് ബ്രാഞ്ച് പ്രിന്സിപ്പല് അബൂബക്കര് എന്നിവരും ചടങ്ങില് സംബന്ധിച്ചു.
മാതാപിതാക്കള്ക്ക് വേണ്ടിയുള്ള ബോധവത്കരണ ക്ലാസ് ഗൈനെക്കോളജിസ്റ്റായ ഹരിപ്രസാദ് കൈകാര്യം ചെയ്തു. ആഷിഖ്, ബാലകൃഷ്ണന് എന്നിവരടങ്ങിയ ശിശുരോഗവിഭാഗം ഡോക്ടര്മാര് ഭിന്നശേഷിയുള്ള കുട്ടികളുടെ ആരോഗ്യപ്രശ്നങ്ങള് വിലയിരുത്തുകയും അവര്ക്കുവേണ്ട ചികിത്സ നിര്ദ്ദേശിക്കുകയും ചെയ്തു.
കണ്ണൂര് ഗൈനെക്കോളജി സൊസൈറ്റിയുടെ ആഭിമുഖ്യത്തില് തണല്വീട് വൃദ്ധസദനത്തിലെ അന്തേവാസികള്ക്കുള്ള ഉച്ചഭക്ഷണവും കമ്പിളിപ്പുതപ്പുകളും ഇതിന്റെ ഭാഗമായി വിതരണം ചെയ്തു.
