പയ്യന്നൂര്: ഏഴിമല ചെരുവില് കളരിപ്പൊയ്ത്ത് തുടങ്ങി. രാമന്തളിയിലെ കൊടക്കല്, കാട്ടൂര് തറവാട്ടുകാരുടെ പിന്മുറക്കാരാണ് കാലങ്ങളായി തുടര്ന്നുവരുന്ന കളരിപ്പൊയ്ത്തിനായി കച്ചമുറുക്കിയിറങ്ങിയത്. ചേര, ചോള, ചാലൂക്യ, മൂഷക വംശപരമ്പരകളുടെ ഭരണത്തിന് കീഴിലായിരുന്ന ഈ പ്രദേശങ്ങളിലെ നായന്മാരായിരുന്നു മുഷക രാജവംശത്തിന്റെ പടയാളികള്. ഈ പടയാളികളുടെ സ്മരണയിലാണ് പിന്മുറക്കാര് ഒത്തുകൂടി ആചാര്യവിധികളോടെ കളരിപ്പൊയ്ത്ത് നടത്തുന്നത്. രാമന്തളി ശങ്കരനാരായണ ക്ഷേത്രത്തിന്റെ പടിഞ്ഞാറുഭാഗത്ത് കോമന്നന് കെട്ടിച്ചതെന്ന് വിശ്വസിക്കുന്ന കളരിക്കൊട്ടാരത്തിലാണ് കളരിപ്പൊയ്ത്ത്.
മുന്കാലത്ത് ഒരുമാസത്തോളം നീണ്ടുനിന്നിരുന്ന പൊയ്ത്ത് ഇപ്പോള് മൂന്ന് ദിവസമായിചുരുക്കിയിട്ടുണ്ട്. നാളെ കളരിപൂജ നടക്കും. തുടര്ന്ന് പത്താം നാളില് താവൂരിയാട് ലോകരെ കളരിക്കൊട്ടാരം ക്ഷേത്രത്തില് കളിയാട്ട മഹോത്സവം ആരംഭിക്കും.
