കണ്ണൂര്: വിദ്യാര്ഥികളില് ചരിത്രാവബോധവും പൈതൃകാഭിമുഖ്യവും വളര്ത്തുന്നതിനായി സംസ്ഥാന ആര്ക്കൈവ്സ് വകുപ്പ് സംഘടിപ്പിച്ച ചരിത്രക്വിസ് മത്സരമായ കേരള ചരിത്ര സമസ്യയുടെ സംസ്ഥാനതല മെഗാഫൈനലില് കണ്ണൂര് ജില്ലയില് നിന്നുള്ള ടീം ജേതാക്കളായി. പെരളശ്ശേരി എകെജിഎത് ഗവ. ഹയര് സെക്കന്ററി സ്കൂള് വിദ്യാര്ഥികളായ കെ.ടി.സാഞ്ചിത്ത്, അഭിനവ് മനോജ് എന്നിവരടങ്ങുന്ന ടീമാണ് അഭിമാനാര്ഹമായ നേട്ടം കൈവരിച്ചത്. എറണാകുളം പൂത്തോട്ട കെപിഎംവി ഹയര് സെക്കന്ററി സ്കൂളിലെ ആര്.ജിതിന് ദേവ്, കെ.എസ്.സാന്ദ്ര ടീം രണ്ടും തൊടുപുഴ ജയറാണി ഇഎംഎച്ച്എസ്എസ്സിലെ അനസൂയ സി സുധന്, ജീവന് ജോസ് എന്നിവരുടെ ടീം മൂന്നും സ്ഥാനങ്ങള് നേടി.
വിജയികള്ക്കുള്ള സമ്മാനങ്ങള് തുറമുഖ -മ്യൂസിയം-പുരാവവസ്തു-പുരാരേഖാ വകുപ്പ് മന്ത്രി രാമചന്ദ്രന് കടന്നപ്പള്ളി വിതരണം ചെയ്തു. ആദ്യ മൂന്ന് സ്ഥാനക്കാര്ക്ക് 25,000, 15,000, 10,000 രൂപ വീതവും സര്ട്ടിഫിക്കറ്റുമാണ് വിജയികള്ക്ക് സമ്മാനമായി നല്കിയത്. വിജയികളെ മന്ത്രി അനുമോദിച്ചു. ഇന്നത്തെ വിദ്യാര്ഥികളില് ചരിത്രബോധം കുറഞ്ഞുവരികയാണെന്നും ചരിത്രത്തെക്കുറിച്ച് ബോധ്യമില്ലാത്ത തലമുറയ്ക്ക് നാളെയുടെ വെല്ലുവിളികളെ ഏറ്റെടുക്കാനാവില്ലെന്നും മന്ത്രി പറഞ്ഞു.
കണ്ണൂര് ചേംബര് ഓഫ് കോമേഴ്സ് ഹാളില് നടന്ന ചടങ്ങില് പി.കെ.ശ്രീമതി എംപി അധ്യക്ഷത വഹിച്ചു. ജില്ലാ പഞ്ചായത്ത് പ്രസിഡന്റ് കെ.വി.സുമേഷ്, കോര്പറേഷന് സ്റ്റാന്റിംഗ് കമ്മിറ്റി ചെയര്പേഴ്സണ് സി.സീനത്ത്, സംസ്ഥാന ആര്ക്കൈവ്സ് വകുപ്പ് ഡയരക്ടര് പി ബിജു, സംസ്ഥാന പുവാവസ്തു വകുപ്പ് ഡയരക്ടര് ജെ.രജീകുമാര്, എസ്എസ്എ ജില്ലാ പ്രോഗ്രാം ഓഫീസര് ഡോ. പി.പി.പുരുഷോത്തമന് തുടങ്ങിയവര് സംസാരിച്ചു.
സ്കൂള്-വിദ്യാഭ്യാസ ജില്ലാതല മല്സരങ്ങള്ക്കു ശേഷം കോഴിക്കോട്, എറണാകുളം, തിരുവനന്തപുരം എന്നീ മൂന്ന് മേഖലകളില് നടന്ന മല്സരത്തില് ആദ്യ മൂന്ന് സ്ഥാനങ്ങള് നേടിയ ഒമ്പത് ടീമുകളാണ് സംസ്ഥാനതല മെഗാ ഫൈനലില് മാറ്റുരച്ചത്.
