കൊച്ചി: പശ്ചിമഘട്ട പര്വ്വതനിരകള് ഉള്പ്പെടെയുള്ള ഉഷ്ണമേഖലാ ആവാസവ്യവസ്ഥകളില് കാണുന്ന പൊടിമീനുകള് ജൈവപരിണാമത്തിലെ നിര്ണ്ണായക കണ്ണികളാണെന്ന് ബ്രിട്ടീഷ് നാച്ചുറല് ഹിസ്റ്ററി മ്യൂസയത്തിലെ ശാസ്ത്രജ്ഞനായ റാള്ഫ് ബിറ്റ്സ്.
കേരള ഫിഷറീസ് സമുദ്ര പഠന സര്വ്വകലാശാലയില് (കുഫോസ്) വിദ്യാര്ത്ഥികളോടും ഗവേഷകരോടും സംസാരിക്കുകയായിരുന്നു അദ്ദേഹം. ഉഷ്ണമേഖലാ രാജ്യങ്ങളില് നിന്ന് നൂറോളം പുതിയ മത്സ്യ ഇനങ്ങളെ കണ്ടെത്തിയിട്ടുള്ള റാള്ഫ് ബിറ്റ്സ് ലോകത്തിലെ ഏറ്റവും പ്രമുഖനായ ഫിഷ് ടാക്സോണമിസ്റ്റ്(മത്സ്യങ്ങളുടെ വര്ഗീകരണം സംബന്ധിച്ച പഠനശാഖ) ആയാണ് അറിയപ്പെടുന്നത്.
26 മില്ലി മീറ്റര് വരെ വലിപ്പമുള്ള മീനുകളെയാണ് പൊടിമീനുകള് അഥവാ ‘ടൈനി ഫിഷ്’ എന്ന ഗണത്തില് ശാസ്ത്രലോകം പെടുത്തുന്നത്. ഇന്ത്യയും ബ്രസീലും ഉള്പ്പടെയുള്ള ഉഷ്ണമേഖലാ രാജ്യങ്ങള് പൊടിമീനുകളുടെ വൈവിധ്യത്തിന്റെ കലവറയാണെന്ന് റാള്ഫ് ബിറ്റ്സ് പറഞ്ഞു. പരിസ്ഥിതി സന്തുലനത്തിലും ജൈവചങ്ങലയിലും പൊടി മീനുകളുടെ പ്രാധാന്യം എന്താണെന്ന് ശാസ്ത്രലോകം ഇനിയും പഠിക്കാനിരിക്കുന്നതേയുള്ളൂ. മനുഷ്യരുടെ സാന്നിധ്യം അധികമില്ലാത്ത കന്യാവനങ്ങളിലെ ജലാശയങ്ങളിലാണ് പൊടിമീനുകള് മുഖ്യമായും കണ്ടുവരുന്നത്.
ഉഷ്ണമേഖലാ രാജ്യങ്ങളില് ഉയര്ന്ന അളവില് സംഭവിക്കുന്ന പരിസ്ഥിതി നാശം പൊടിമീനുകളുടെ ആവാസ വ്യവസ്ഥകള് അതിവേഗം ഇല്ലാതാക്കുമെന്ന് റാള്ഫ് ബിറ്റ്സ് പറഞ്ഞു.
