പാലോട്: മകളെ മര്ദ്ദിക്കുന്നത് തടഞ്ഞ അച്ഛനെ കുത്തിക്കൊന്ന കേസില് മരുമകന് അറസ്റ്റില്. ചുള്ളിമാനൂര് മൊട്ടക്കാവ് കടുവാച്ചിറ പാറയംവിളാകത്ത് വീട്ടില് വിനോദ് എന്ന എസ്. രാഗേഷ് (35) ആണ് പാലോട് പോലീസിന്റെ പിടിയിലായത്. വിതുര ചേന്നന്പാറ പന്നിയോട്ടുമൂലയില് സുന്ദരനെ കൊലപ്പെടുത്തിയ കേസിലാണ് അറസ്റ്റ്.
പോലീസ് പറയുന്ന വിവരം: കഞ്ചാവിനും മദ്യത്തിനും അടിമയായ രാഗേഷ് ഭാര്യ പ്രിയയെ നിരന്തരം ശാരീരികമായി ഉപദ്രവിച്ചിരുന്നു. മകളെ സ്ഥിരമായി ദേഹോപദ്രവം ഏല്പ്പിക്കുന്നത് പറഞ്ഞു വിലക്കുന്നതിലുള്ള വിരോധമാണ് സുന്ദരന്റെ കൊലയില് കലാശിച്ചത്. 18 ന് ഉച്ചയ്ക്ക് ഒന്നരയോടെയാണ് സംഭവം. ആഹാരം വിളമ്പാന് ആവശ്യപ്പെട്ടപ്പോള് കൈയിലിരുന്ന കുഞ്ഞിനെ കിടത്തിയിട്ട് വരാമെന്ന് പറഞ്ഞ പ്രിയയെ ലഹരിയിലായിരുന്ന രാഗേഷ് ദേഹോപദ്രവം ഏല്പ്പിച്ചു. തടസം പിടിക്കാനെത്തിയ സുന്ദരനെ കിടപ്പുമുറിയിലെ അലമാരിയില് സൂക്ഷിച്ചിരുന്ന കത്തിയെടുത്തു നെഞ്ചില്കുത്തിയ ശേഷം ഇറങ്ങിയോടി. സുന്ദരനെ വിതുര ആശുപത്രിയില് എത്തിച്ചപ്പോഴേക്കും മരിച്ചു.
ചുള്ളിമാനൂരിലെ സ്വന്തം വീട്ടിലെത്തി വസ്ത്രം മാറിയശേഷം ഒളിവില്പോകാനുള്ള ശ്രമത്തിനിടെ പാലോട് സിഐ കെ.ബി. മനോജ്കുമാറും വിതുര എസ്ഐ കെ.ആര്. ബിജുവും ചേര്ന്ന് നെടുമങ്ങാട് ബസ് സ്റ്റാന്റില് വച്ച് രാഗേഷിനെ പിടികൂടുകയായിരുന്നു. കുത്താനുപയോഗിച്ച കത്തി വീടിനു സമീപത്തെ റബ്ബര് തോട്ടത്തില് നിന്ന് കണ്ടെടുത്തു. നെടുമങ്ങാട് കോടതിയില് ഹാജരാക്കിയ പ്രതിയെ റിമാന്ഡ് ചെയ്തു.
