കൊച്ചി: ഉന്നത തലത്തില് നടന്ന അഴിച്ചുപണിക്ക് ശേഷം കൊച്ചി സ്മാര്ട്ട് സിറ്റി പ്രവര്ത്തനങ്ങള് കൂടുതല് സജീവമായി. ഒന്നാം ഐടി മന്ദിരത്തില് ഒരു മാസത്തിനിടെ മൂന്ന് കമ്പനികള് കൂടി പ്രവര്ത്തനം തുടങ്ങി. ഗാഡ്ജിയോണ് സ്മാര്ട് സിസ്റ്റംസ്, അബ്സര് ടെക്നോളജീസ്, ഓബറോണ് ടെക്നോളജീസ് എന്നീ കമ്പനികളാണ് പ്രവര്ത്തനം തുടങ്ങിയത്. ഇതോടെ ഇവിടെ പ്രവര്ത്തനം ആരംഭിച്ച കമ്പനികളുടെ എണ്ണം 16 ആയി.
ഇന്റര്നെറ്റ് ഓഫ് തിങ്സ് (ഐഒടി), ഹോം ഓട്ടോമേഷന്, ഇന്ഡസ്ട്രിയല് ഓട്ടോമേഷന്, ഹെല്ത്ത്കെയര്, കമ്മ്യൂണിക്കേഷന് തുടങ്ങിയ സേവനങ്ങള് ലഭ്യമാക്കുന്നതില് സ്പെഷലൈസ് ചെയ്തതാണ് ആഗോള ഇലക്ട്രോണിക്സ് പ്രോഡക്ട് ഡിസൈന് കമ്പനിയായ ഗാഡ്ജിയോണ് സ്മാര്ട് സിസ്റ്റംസ്. കൊച്ചി ആസ്ഥാനമായി പ്രവര്ത്തിക്കുന്ന കമ്പനിയിലെ 145 ജീവനക്കാരില് നിലവില് 30 പേരെയാണ് സ്മാര്ട്ട് സിറ്റിയിലേക്ക് മാറ്റിയത്. ജീവനക്കാരുടെ എണ്ണം വര്ധിപ്പിക്കുമെന്ന് ഗാഡ്ജിയോണ് സ്മാര്ട് സിസ്റ്റംസ് സിഇഒയും ഡയറക്ടറുമായ ഹരിപ്രസാദ് വി. നായര് പറഞ്ഞു.
ടെക്നോളജി സൊല്യൂഷന് കമ്പനിയായ അബ്സര് ടെക്നോളജി സൊല്യൂഷന്സ്, എന്റര്പ്രൈസ് റിസോഴ്സ് പ്ലാനിങ് (ഇആര്പി), മൊബിലിറ്റി, ബിസിനസ് ഇന്റലിജന്സ്, ഡിജിറ്റല് പേയ്മെന്റ് സൊല്യൂഷന്സ് തുടങ്ങിയവയിലാണ് സ്പെഷലൈസ് ചെയ്തിരിക്കുന്നത്. ഹെല്ത്ത് കെയര്, സപ്ലൈ ചെയ്ന്, ഇ-കൊമേഴ്സ്, പേയ്മെന്റ് ഇന്ഡസ്ട്രി തുടങ്ങിയ മേഖലകളിലാണ് കമ്പനി പ്രധാനമായും സേവനം നല്കുന്നതെന്ന് എംഡി ഷംസുദ്ദീന് വെങ്കിട്ട പറഞ്ഞു.
സോഫ്റ്റ്വെയര് ഡെവലപ്മെന്റ് കമ്പനിയായ ഓബറോണ് ടെക്നോളജി 2,732 ചതുരശ്ര അടി സ്ഥലമാണ് ഏറ്റെടുത്തതെന്ന് എംഡി രാമന് അശോക്കുമാര് പറഞ്ഞു. ചില പ്രമുഖ ഐടി കമ്പനികളുടെ ഓഫീസ് ഫിറ്റ്-ഔട്ട് ജോലികള് പുരോഗമിക്കുകയാണ്. അവയും പ്രവര്ത്തനം തുടങ്ങുന്നതോടെ സ്മാര്ട്സിറ്റിയിലെ ആദ്യ ഐടി ടവറില് ഐടി വ്യവസായങ്ങള്ക്കായി നീക്കിവെച്ചിട്ടുള്ള സ്ഥലത്തിന്റെ 78 ശതമാനവും പ്രവര്ത്തനക്ഷമമാകും.
