തിരുവനന്തപുരം: പാറായി ജയരാജന് എന്ന പി. ജയരാജന് കണ്ണൂരിന്റെ ചുവന്ന നക്ഷത്രമാണ്. കണ്ണൂരില് ഒരു ‘സഖാവേ’യുള്ളൂ. അത് കൃഷ്ണപിള്ളയല്ല ജയരാജനാണ്. ജയരാജന്റെ ഫേസ്ബുക്ക് പേജിലേക്കൊന്ന് എത്തി നോക്കിയാല് ജയരാജനെ വാഴ്ത്തിക്കൊണ്ടുള്ള കുറിപ്പുകളുടെ നീണ്ടനിര തന്നെ കാണാം. ഒന്നും ഡിലീറ്റ് ചെയ്യാന് ജയരാജന് തോന്നിയിട്ടില്ല. ഇനിയും പോരട്ടെ എന്ന ഭാവമാണെങ്ങും.
ചിരിക്കാത്ത കമ്മ്യൂണിസ്റ്റ് എന്നാണ് പിണറായിയെക്കുറിച്ചുള്ള ആക്ഷേപം. ഇരട്ടച്ചങ്കനാണെങ്കിലും പിണറായിക്ക് ഇരട്ട മുഖമില്ല. പറയാനുള്ളത് മറയില്ലാതെ പറയും. ചെയ്യാനുള്ളതും അങ്ങനെതന്നെ. എന്നാല്, ചിരിക്കാത്ത പി. ജയരാജനെ നമുക്ക് കാണാന് കഴിയില്ല. നന്നായി പെരുമാറും. സഭ്യമായ ഭാഷയില് സംസാരിക്കും. കണ്ടാല് അയ്യോ, കണ്ണൂരിലെ പാര്ട്ടി സെക്രട്ടറി ഒരു പാവം എന്നേ ആദ്യ പ്രതികരണമുണ്ടാകൂ. ഈ പാവം ഭാവത്തിന് പിന്നില് മറ്റൊരു മുഖമുണ്ടെന്ന് പൊതുജനത്തിന് മാത്രമല്ല ഇപ്പോള് പാര്ട്ടിക്കും ബോധ്യമായിരിക്കുന്നു.
അതുകൊണ്ടാണല്ലോ കഴിഞ്ഞ ദിവസം സംസ്ഥാന സമിതി ജയരാജനെ നിര്ത്തി പൊരിച്ചത്. സഹിക്കാന് കഴിയാതെ യോഗത്തില്നിന്ന് ഇറങ്ങിപ്പോവുകയും ചെയ്തു. 12 മണിക്കൂറിനുശേഷം വീണ്ടുവിചാരമുണ്ടായി. ഇറങ്ങിപ്പോയി എന്ന വാര്ത്ത വാസ്തവവിരുദ്ധമാണെന്ന് പ്രസ്താവിച്ച ജയരാജന്, വിമര്ശന വിധേയനായി എന്ന വാര്ത്തയോട് മൗനം പാലിച്ചു.
രാജ്യത്ത് ഏറ്റവും കൂടുതല് ശക്തി സിപിഎമ്മിന് കണ്ണൂരിലാണ.് നേരത്തെ മത്സരിക്കാന് പശ്ചിമബംഗാളിലെ മിഡ്നാപൂരുണ്ടായിരുന്നു. പാര്ട്ടിയുടെ പ്രവര്ത്തന മികവുമൂലം മിഡ്നാപൂരില് പാര്ട്ടി നിലംപരിശായി. ഇനി കണ്ണൂരിനെ എതിരിടാന് ഒരു ജില്ലയിലെ പാര്ട്ടിക്കും ശേഷിയില്ല. ആ ജില്ലയിലെ പാര്ട്ടി സെക്രട്ടറി കരുത്തനാണ്.
പാര്ട്ടി സംസ്ഥാന സെക്രട്ടറിക്കും മുഖ്യമന്ത്രിക്കുപോലും അതീതനായി ജില്ലാ സെക്രട്ടറി കരുത്തുറപ്പിച്ചു. അതുകൊണ്ടുതന്നെയാണ് പാര്ട്ടി സെക്രട്ടറിയുടെ പേരില് കീര്ത്തനങ്ങളും ആല്ബങ്ങളും നൃത്തശില്പ്പങ്ങളുമെല്ലാം പുറത്തിറങ്ങിയത്. ഒന്നും താനുണ്ടാക്കിയതല്ലെന്ന് വിശദീകരിക്കുന്ന ജില്ലാ സെക്രട്ടറി, ഒരിക്കല് പോലും എന്തേ ഇത് പാടില്ല എന്ന് പറഞ്ഞില്ലെന്ന ചോദ്യം പ്രസക്തമാണ്.
