രാംപൂര്: വിദേശ നിക്ഷേപം സംബന്ധിച്ച പാരഡൈസ് പേപ്പറില് വമ്പന്മാര്ക്കൊപ്പം ഒരു ക്ലര്ക്കിനെന്തു കാര്യം? എല്ലാവര്ക്കും അതു തന്നെയാണ് സംശയം.
വന് പേരുകാരുള്പ്പെട്ട പട്ടികയില് ഉത്തര്പ്രദേശിലെ രാംപൂരില് നിന്നുള്ള സാധാരണക്കാരനും ഉള്പ്പെട്ടിരിക്കുന്നു. ദുബായിലെ മണി എക്സ്ചേഞ്ച് സ്ഥാപനത്തില് ക്ലര്ക്കായ ഇദ്ദേഹത്തിന്റെ പേര് കഴിഞ്ഞ ദിവസം പുറത്തുവിട്ട പാരഡൈസ് പേപ്പറുകളിലുണ്ട്. നികുതി വെട്ടിക്കാന് വിദേശത്ത് പണം നിക്ഷേപിച്ചുവെന്ന് വ്യക്തമാക്കുന്ന 714 ഇന്ത്യക്കാരില് ഒരുവനാണ് ഇയാള്. ആകെ ദുരൂഹമായൊരു ഇടപാട്.
ജാവേദ് ഖാന്. വയസ് 42. സിയാം ക്യാപിറ്റല് ആന്ഡ് ഇന്വസ്റ്റ്മെന്റ് ലിമിറ്റഡ് എന്നാണ് പാരഡൈസ് രേഖകളില് ഇദ്ദേഹത്തെ രേഖപ്പെടുത്തിയിട്ടുള്ളത്. സമാജ്വാദി പാര്ട്ടി നേതാവ് അസം ഖാന്റെ മണ്ഡലത്തിലാണ് ജാവേദിന്റെ വീട്. 2003 നവംബര് 10 മുതല് സിയാമിന്റെ ഡയറക്ടറും ഓഹരിയുടമയുമാണ് ജാവേദ്. ബ്രിട്ടീഷ് വിര്ജിന്, കരീബിയന് ദ്വീപുകളിലാണ് ഈ കമ്പനിയുടെ വിലാസം നല്കിയിട്ടുള്ളത്. 2006 ആഗസ്ത് 22ന് സിയാമില് നിന്ന് വിട്ടുവെന്നും രേഖകളിലുണ്ട്.
ദുബായില് വാള് സ്ട്രീറ്റ് എക്സ്ചേഞ്ചില് ജോലി ചെയ്യുന്ന ഇദ്ദേഹം ഇതേക്കുറിച്ച് വ്യക്തമായി ഒന്നും പറയുന്നില്ല. 2000 മുതല് ഈ കമ്പനിയില് ജോലി ചെയ്യുന്നുവെന്ന് ജാവേദ് പറയുന്നു. മുംബൈയിലെ വ്യവസായി ആരിഫ് പട്ടേലിന്റേതാണ് സ്ഥാപനം. ആരിഫ് നിര്ദേശിച്ചതനുസരിച്ച് ചില കടലാസുകളില് ഒപ്പിട്ടു. സിയാമില് നിന്ന് വാള് സ്ട്രീറ്റിന് വായ്പ ലഭിക്കാനാണിതെന്നാണ് ആരിഫ് പറഞ്ഞതെന്നാണ് വിശദീകരണം. നിയമമനുസരിച്ച് ജീവിക്കുന്നയാളാണ് താനെന്നും നികുതി വെട്ടിച്ചിട്ടില്ലെന്നും ഇദ്ദേഹം കൂട്ടിച്ചേര്ത്തു.
ഇരുപത്തഞ്ച് വര്ഷമായി ഗള്ഫിലാണ് ജാവേദ് ജോലി ചെയ്യുന്നത്. നിലവില് 6,500 ദിര്ഹമാണ് മാസശമ്പളം. ഇന്ത്യയില് സ്വന്തമായി വസ്തുക്കളില്ലെന്നും പറയുന്നു. 25 വര്ഷം ഗള്ഫില് ജോലി ചെയ്തിട്ടും നാട്ടില് ഒന്നുമില്ലെന്നു പറയുന്നതിലാണ് ദുരൂഹത. വിവാഹച്ചടങ്ങില് പങ്കെടുക്കാന് കഴിഞ്ഞ മാസം ജാവേദ് നാട്ടിലെത്തിയെന്ന് അമ്മ പറഞ്ഞു. മകനും ഭാര്യയും രാംപൂരിലെ കുടുംബ വീട്ടിലാണ് താമസെന്നും ഒരു ജോലിക്കായി ശ്രമിക്കുന്നുവെന്നുമാണ് അമ്മയുടെ വാദം.
