ന്യൂദല്ഹി: ഇന്ത്യന് സന്ദര്ശനത്തിനെത്തിയ ഭൂട്ടാനിലെ കുഞ്ഞു രാജകുമാരന് കൈ നിറയെ സമ്മാനങ്ങള് നല്കി പ്രധാനമന്ത്രി നരേന്ദ്ര മോദി. നാല് ദിവസത്തെ ഔദ്യോഗിക സന്ദര്ശനത്തിനായി ഇന്ത്യയിലെത്തിയ ഭൂട്ടാന് രാജകുടുംബത്തെ സ്വീകരിച്ച കൂട്ടത്തിലാണ് രാജകുമാരന് മോദി ഫിഫ അണ്ടര് 17 ലോകകപ്പിലെ ഔദ്യോഗിക ഫുട്ബോളും ചെസ് ബോര്ഡും സമ്മാനിച്ചത്.
ദോക് ലം സംഘര്ഷത്തിന് അയവ് വന്നതിന് ശേഷം ആദ്യമായാണ് ഭൂട്ടാന് രാജാവ് ജിഗ്മേ ഖേസര് നംഗ്യേല് വാംഗ്ചുക്കും രാജ്ഞി ജെസ്റ്റണ് പേമയും ഇന്ത്യ സന്ദര്ശിക്കുന്നത്. ബുധനാഴ്ചയാണ് ഇന്ത്യന് പ്രധാനമന്ത്രി നരേന്ദ്രമോദിയുമായി ഭൂട്ടാന് രാജകുടുംബം കൂടിക്കാഴ്ച നടത്തിയത്.രാഷ്ട്രപതി രാംനാഥ് കോവിന്ദ്, ഉപരാഷ്ട്രപതി എം. വെങ്കയ്യ നായിഡു, എന്നിവരുമായി ജിഗ്മേ ഖേസര് നമ്യേല് വാങ്ചക് ബുധനാഴ്ച കൂടിക്കാഴ്ച നടത്തിയിരുന്നു.
ഇന്ത്യന് വിദേശകാര്യമന്ത്രിയുടെ കൈ പിടിച്ച് നില്ക്കുന്ന ഭൂട്ടാനിലെ കുഞ്ഞ് രാജകുമാന്റെ ചിത്രം സോഷ്യല് മീഡിയയില് വൈറലായിരുന്നു. കുഞ്ഞുരാജകുമാരനെ മാധ്യമപ്രവര്ത്തകര് അഭിവാദ്യം ചെയ്തപ്പോള് പ്രത്യഭിവാദ്യം ചെയ്യാന് രാജകുമാരനെ സുഷമ സഹായിക്കുകയും ചെയ്യുന്നതായിരുന്നു ചിത്രം.
ദോക് ലാമില് ഇന്ത്യയുടെയും ചൈനയുടെയും സൈന്യങ്ങള് തമ്മിലുണ്ടായിരുന്ന സംഘര്ഷാന്തരീക്ഷം അവസാനിച്ച് ആഴ്ചകള് പിന്നിടുമ്പോഴാണ് ഭൂട്ടാന് രാജാവിന്റെ ഇന്ത്യന് സന്ദര്ശനമെന്നത് ശ്രദ്ധേയമാണ്. 2018ല് ഇന്ത്യയും ഭൂട്ടാനും തമ്മിലുള്ള നയതന്ത്രപരമായ സൗഹൃദത്തിന്റെ സുവര്ണ ജൂബിലി ആഘോഷിക്കാന് ഇരു രാജ്യങ്ങളും തമ്മില് ധാരണയിലത്തിയിട്ടുണ്ടെന്ന് ഭൂട്ടാന് എംബസി സ്ഥിരീകരിച്ചു.
Presented the Prince of Bhutan an official football from the FIFA U-17 World Cup and a chess set. pic.twitter.com/91xLRURPnJ
— Narendra Modi (@narendramodi) November 1, 2017
