കണ്ണൂര്: ഇന്ത്യന് ഫെര്ട്ടിലിറ്റി സൊസൈറ്റിയുടെ കേരള ചാപ്റ്റര് സംസ്ഥാന സമ്മേളനം ആര്ട്കോണ് 2017 നാല്, അഞ്ച് തിയ്യതികളില് മലബാര് റസിഡന്സി ഹോട്ടലില് നടക്കും. കണ്ണൂര് ഗൈനക്കോളജിക്കല് സൊസൈറ്റിയുടെ ആഭിമുഖ്യത്തില് നടക്കുന്ന പരിപാടി നാലിന് വൈകീട്ട് 6.30 ന് ഇന്ത്യന് ഫെര്ട്ടിലിറ്റി സൊസൈറ്റി ദേശീയ പ്രസിഡന്റ് സൊഹാനി വര്മ്മ ഉദ്ഘാടനം ചെയ്യുമെന്ന് സംഘാടകര് വാര്ത്താസമ്മേളനത്തില് അറിയിച്ചു. സംസ്ഥാനത്തിന്റെ വിവിധ ഭാഗങ്ങളില് നിന്നുള്ള ഇരുനൂറോളം ഗൈനക്കോളജിസ്റ്റുകള് പങ്കെടുക്കും. കാന്സര് പോലുള്ള രോഗങ്ങള്ക്ക് ചികിത്സ തേടുന്നവരുടെ പ്രത്യുത്പാദനശേഷിക്ക് കോട്ടം സംഭവിക്കുന്നതിന് പരിഹാരമായി പ്രത്യുത്പാദനശേഷി സംരക്ഷണത്തിന് പ്രാധാന്യം നല്കുന്ന ഫെര്ട്ടിലിറ്റി പ്രിസര്വേഷന് എന്ന വിഷയത്തില് പ്രത്യേക പ്രബന്ധം സമ്മേളനത്തില് അവതരിപ്പിക്കും. വന്ധ്യതാ ചികിത്സാ വിദഗ്ധന് ഡോ.പങ്കജ് തല്വാര് പ്രബന്ധം അവതരിപ്പിക്കും. ഇത് കൂടാതെ സ്ത്രീപുരുഷ വന്ധ്യത, ഗര്ഭസ്ഥ ശിശുവിന്റെ ആരോഗ്യസ്ഥിതിയെ പറ്റി പ്രതിപാദിക്കുന്ന ഫീറ്റല് മെഡിസിന് എന്നിവയെയും കുറിച്ചും അവതരണം ഉണ്ടാകും. വന്ധ്യതാചികിത്സയിലെ ആധുനിക സംവിധാനങ്ങളായ ഐവിഎഫ് ഇക്സി, ലേസര് അസിസ്റ്റഡ് ഹാച്ചിങ്ങ് എന്നിവയുടെ തത്സമയ സംപ്രേക്ഷണം ഉണ്ടാകും. വന്ധ്യതാ ചികിത്സാനന്തര ഗര്ഭകാല പരിചരണത്തെ കുറിച്ചുള്ള പാനല് ചര്ച്ചയും ഇതോടനുബന്ധിച്ച് നടക്കും. കേരളത്തിനകത്തും പുറത്ത് നിന്നുമുള്ള നാല്പതിലധികം വന്ധ്യതാ, ഫീറ്റല് മെഡിസിന് വിദഗ്ധര് വിവിധ വിഷയങ്ങളില് പ്രബന്ധങ്ങള് അവതരിപ്പിക്കും. സമ്മേളനത്തോടനുബന്ധിച്ച് ബിരുദാനന്തര വിദ്യാര്ത്ഥികള്ക്ക് പ്രശ്നോത്തരി മത്സരവും സംഘടിപ്പിക്കും. വാര്ത്താസമ്മേളനത്തില് സൊസൈറ്റി പ്രസിഡന്റ് ഡോ.മിനി ബാലകൃഷ്ണന്, സെക്രട്ടറി ഡോ.ഷൈജസ് നായര് എന്നിവര് പങ്കെടുത്തു.
ആര്ട്കോണ് 2017′ നാല് മുതല്
ബന്ധപ്പെട്ട വാര്ത്തകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.