കണ്ണൂര്: വിദ്യാര്ത്ഥികളെ വിജ്ഞാനത്തിന്റെ വിശാല ലോകത്തെത്തിക്കാന് സര്വ്വശിക്ഷാ അഭിയാന് കേരളപ്പിറവിദിനം മുതല് വിദ്യാലയങ്ങളില് നല്ല വായന, നല്ല പഠനം, നല്ല ജീവിതം, പരിപാടി ആവിഷ്ക്കരിക്കുന്നു. സാമൂഹ്യ, സാംസ്ക്കാരിക ജീവിതത്തിന്റെ വൈവിധ്യം മനസ്സിലാക്കാനും, ആസ്വാദനത്തിന്റെയും ഭാവനയുടെയും അമൂല്യാനുഭവങ്ങള് സൃഷ്ടിക്കാനും വിദ്യാര്ത്ഥികളെ വയനയിലൂടെ സജ്ജരാക്കുകയാണ് പരിപാടിയുടെ ലക്ഷ്യം. ഇതിന്റെ ഭാഗമായി വിവിധ ക്ലാസ് നിലവാരത്തിലുള്ള കുട്ടികള്ക്കനുയോജ്യമായ പുസ്തകങ്ങള് വിദ്യാലയങ്ങളില് സമാഹരിക്കുകയും ഓരോ ക്ലാസിലും ഓരോ ലൈബ്രറി ഒരുക്കുകയും ചെയ്യും. വിവിധ വിദ്യാലയങ്ങളിലേക്ക് പുസ്തകയാത്ര സംഘടിപ്പിക്കും.
വായിച്ച പുസ്തകങ്ങളെക്കുറിച്ച് വിദ്യാര്ത്ഥികള് സ്കൂള് അസംബ്ലിയില് അവലോകനം നടത്തും. സ്കൂളുകളില് സാഹിത്യസദസുകളും ശില്പശാലകളും കവിയരങ്ങുകളും എഴുത്തുകാരായ അധ്യാപകരുടെ സംഗമവും സംഘടിപ്പിക്കും. കുട്ടികള് തയ്യാറാക്കുന്ന വായനക്കുറിപ്പ് സമാഹരിച്ച് പ്രസിദ്ധീകരിക്കും. ഇതിന്റെ മുന്നോടിയായി ഇന്ന് ഉച്ചക്ക് 2 മണിക്ക് കണ്ണൂര് ശിക്ഷക്സദനില് വായനയും സമൂഹവും എന്ന വിഷയത്തില് സെമിനാര് സംഘടിപ്പിക്കും. സെമിനാര് ജില്ലാ പഞ്ചായത്ത് പ്രസിഡണ്ട് കെ.വി.സുമേഷ് ഉദ്ഘാടനം ചെയ്യും. വിദ്യാഭ്യാസ ഉപഡയറക്ടര് യു.കരുണാകരന് അധ്യക്ഷത വഹിക്കും. കരിവെള്ളൂര് മുരളി വിഷയം അവതരിപ്പിച്ച് സംസാരിക്കും. ഡയറ്റ് പ്രിന്സിപ്പല് കെ.പ്രഭാകരന്, ജില്ലാ ലൈബ്രറി കൗണ്സില് സെക്രട്ടറി പി.കെ. ബൈജു, ടിടിഐ മെന് പ്രിന്സിപ്പല് പി.ആര്.വസന്തകുമാര് എന്നിവര് സംസാരിക്കും
