മഞ്ചേരി: വിദ്യാര്ത്ഥികള്ക്കിടയില് വില്പന നടത്താനെത്തിച്ച കഞ്ചാവുമായി അരീക്കോട് സ്വദേശി മഞ്ചേരി എക്സൈസ് സംഘത്തിന്റെ പിടിയിലായി. വെള്ളേരി വെറ്റിലപ്പാറ സുരേഷ്കുമാര് (45) ആണ് അറസ്റ്റിലായത്.
അരീക്കോട് വെള്ളേരി ഭാഗത്ത് വാഹന പരിശോധന നടത്തുന്നതിനിടെ ബൈക്കില് കഞ്ചാവുമായി വരുമ്പോഴാണ് സുരേഷ്കുമാര് പിടിയിലായത്. വാഹനത്തില് നിന്നും 1.2 കിലോഗ്രാം കഞ്ചാവും പിടിച്ചെടുത്തു. അരീക്കോടും സമീപ പ്രദേശങ്ങളിലും വിദ്യാര്ത്ഥികള്ക്ക് കഞ്ചാവു വില്പന നടത്തിവരികയായിരുന്നു ഇയാളെന്ന് എക്സൈസ് ഇന്സ്പെക്ടര് സി ശ്യാംകുമാര് പറഞ്ഞു.
കോളജുകളും സ്കൂളുകളും കേന്ദ്രീകരിച്ചായിരുന്നു ചില്ലറ വില്പന. തമിഴ്നാട്ടിലെ കമ്പം, തേനി ഭാഗങ്ങളില് നിന്നാണ് കഞ്ചാവെത്തിച്ചിരുന്നതെന്ന് ഇയാള് മൊഴി നല്കിയിട്ടുണ്ട്. മഞ്ചേരി ജെഎഫ്സിഎം കോടതിയില് ഹാജരാക്കിയ പ്രതിയെ 14 ദിവസത്തേക്ക് റിമാന്റ് ചെയ്തു.
