മണിമല: ബസ് സ്റ്റാന്റിനും മൂങ്ങാനിക്കുമിടയിലുള്ള അരകിലോമീറ്റര് ദൂരത്തിനുള്ളില് അപകടം പതിവാകുന്നു. വഴിവിളക്കില്ലാത്തതും വാഹനങ്ങളുടെ അമിതവേഗത നിയന്ത്രിക്കാനായി റോഡില് ഹമ്പില്ലാത്തതുമാണ് അപകടങ്ങള്ക്ക് പ്രധാന കാരണം. നിരവധി അപകടങ്ങള് ഉണ്ടായിട്ടും അപകടമുന്നറിയിപ്പ് ബോര്ഡ് സ്ഥാപിക്കാന് പോലും അധികൃതര് തയാറായിട്ടില്ലെന്ന് ആക്ഷേപമുണ്ട്.
കറുകച്ചാല് മണിമല റോഡില് മൂങ്ങാനിയില് ഗ്രാമീണ്ബാങ്കിനും സ്കൂളിനുമിടയിലാണ് പത്തോളം അപകടങ്ങള് നടന്നത്. മൂങ്ങാനി മുതല് മണിമല ബസ്സ്റ്റാന്റ് വരെ വിദ്യാര്ത്ഥികള്ക്കും കാല്നടയാത്രക്കാര്ക്കും നടന്നുപോകാന് റോഡിനിരുവശവും നടപ്പാത നിര്മ്മിക്കണമെന്നും ആവശ്യമുയരുന്നു. രണ്ടു വര്ഷം മുന്പ് ഇതേ സ്ഥലത്ത് വാഹനമിടിച്ച് കാല്നടയാത്രക്കാരന് മരിച്ച സംഭവമുണ്ടായി.
ഒരുമാസത്തിനിടയ്ക്ക് അഞ്ച് പേരാണ് ഇവിടെ വാഹനാപകടത്തില്പ്പെടുന്നത്. അപകടങ്ങള് പതിവാകുമ്പോഴും അധികൃതര് യാതൊരു നടപടിയുമെടുക്കുന്നില്ല.
