രാജാക്കാട്: എന്ആര്സിറ്റി എസ്എന്വി ഹയര്സെക്കണ്ടറി സ്കൂളില് നടന്നുവന്നിരുന്ന റവന്യൂ ജില്ലാ കായിക മേള മഴയെ തുടര്ന്ന് മാറ്റിവച്ചു. കനത്ത മഴയില് ട്രാക്ക് വെള്ളക്കെട്ടായി മാറിയതോടെയാണ് മത്സരങ്ങള് മാറ്റി വച്ചത്.
പൂര്ത്തീകരിക്കുവാനുള്ള മത്സരങ്ങള് 17ന് മുതലക്കോടം സ്കൂളില് വച്ച് നടത്തുമെന്ന് വിദ്യാഭ്യാസ ഉപഡയറക്ടര് എ അബൂബക്കര് അറിയിച്ചു. ചരിത്രത്തിലാദ്യമായി റവന്യൂ ജില്ലാ കായിക മേള ഹൈറേഞ്ചിലേയ്ക്ക് എത്തിയതിന്റെ ആവേശത്തിലായിരുന്നു മലയോരം. കായികമേള വിജയിപ്പിക്കുന്നതിനായി സംഘാടകസമിതിയും അദ്ധ്യാപകരും വിദ്യാര്ത്ഥികളും നാട്ടുകാരും കയ്യുംമെയ്യും മറന്ന് പ്രവര്ത്തിച്ചു. രണ്ടാം ദിവസം മഴ ശക്തമായതോടെ ട്രാക്ക് കുളമായി. ഉച്ചയോടെ മത്സരങ്ങള് താല്ക്കാലികമായി നിര്ത്തിവയ്ക്കുകയായിരുന്നു. വിദ്യാര്ത്ഥികളുടേയും സംഘാടക സമിതിയുടേയും നേതൃത്വത്തില് വെള്ളം നീക്കം ചെയ്ത് ട്രാക്ക് ഉണക്കുന്നതിന് പരിശ്രമം നടത്തിയെങ്കിലും വീണ്ടും മഴ പെയ്തതോടെ മത്സരങ്ങള് മാറ്റിവയ്ക്കുന്നതിന് തീരുമാനിച്ചു. പതിനേഴിന് രാവിലെ മത്സരങ്ങള് ആരംഭിക്കും. തൊടുപുഴ വിദ്യാഭ്യാസ ജില്ലയാണ് മത്സരത്തില് മുന്നേറുന്നത്. സ്കൂള് തലത്തില് വണ്ണപ്പുറം എസ്എന്എം ഹയര്സെക്കണ്ടറി സ്കൂളാണ് മുന്നില്
