കാസര്കോട്: രാഷ്ട്രീയപരമായ വാര്ത്തകള് മാത്രം നല്കാതെ പ്രാദേശിക സംസ്കൃതിയെ കുറിച്ചുള്ള വാര്ത്തകള് കൂടി നല്കാന് മാധ്യമപ്രവര്ത്തകര് തയ്യാറാകണമെന്ന് കേരള ഫോക്ലോര് അക്കാദമി മുന് ചെയര്മാന് ബി.മുഹമ്മദ് അഹമ്മദ് പറഞ്ഞു. ഇന്ത്യയിലെ മതേതര ജീവിതത്തെ ഉയര്ത്തി പിടിക്കാന് എന്ത് ചെയ്യാന് സാധിക്കുമെന്ന് മാധ്യമപ്രവര്ത്തകര് ആലോചിക്കേണ്ടതുണ്ട്. തുറന്ന് പറയാനുള്ള ആര്ജ്ജവം ആര്ക്കു മുന്നിലും മാധ്യമപ്രവര്ത്തകര് പണയപ്പെടുത്തരുതെന്നും അദ്ദേഹം കൂട്ടിച്ചേര്ത്തു. കേന്ദ്ര വാര്ത്താ വിതരണ പ്രക്ഷേപണ മന്ത്രാലയത്തിനു കീഴിലുള്ള മാധ്യമ വിഭാഗമായ പ്രസ് ഇന്ഫമര്മേഷന് ബ്യൂറോ(പിഐബി), കൊച്ചി ഓഫീസ് കാസര്കോട് ടൗണിലെയും സമീപ പ്രദേശങ്ങളിലേയും മാധ്യമപ്രവര്ത്തകര്ക്കായി പ്രാദേശിക മാധ്യമ ശില്പശാല(വാര്ത്താ ലാപ്) ഉദ്ഘാടനം ചെയ്യുകയായിരുന്നു അദ്ദേഹം.
സ്വച്ഛഭാരത് ദൗത്യം പോലുള്ള പദ്ധതികളുടെ നടത്തിപ്പ് സൂക്ഷ്മമായി നിരീക്ഷിച്ച് സമൂഹത്തില് ശുചിത്വം ഉറപ്പ് വരുത്തേണ്ടത് മാധ്യമങ്ങളുടെ കടമയാണെന്ന് വികസനോന്മുഖ മാധ്യമ പ്രവര്ത്തനം എന്ന വിഷയത്തില് സെഷന് കൈകാര്യം ചെയ്ത സംസ്ഥാന ശുചിത്വ മിഷന് കണ്ണുര് അസിസ്റ്റന്റ് കോഓര്ഡിനേറ്റര് സുരേഷ് കസ്തൂരി പറഞ്ഞു. പോസിറ്റീവ് റിപ്പോര്ട്ടിങ്ങ് എന്ന വിഷയത്തില് മാതൃഭൂമി ചീഫ് റിപ്പോര്ട്ടര് കെ.ബാലകൃഷ്ണന്, ഡിജിറ്റല് ഇന്ത്യവെല്ലുവിളികള്, പ്രതീക്ഷകള്, മാധ്യമപ്രവര്ത്തുകരുടെ പങ്ക് എന്ന വിഷയത്തില് മലയാള മനോരമ കണ്ണൂര് യൂണിറ്റ് സബ് എഡിറ്റര് അഹമ്മദ് സുബൈര് പറമ്പന് എന്നിവര് ക്ലാസെടുത്തു. പ്രസ് ക്ലബ് പ്രസിഡന്റ് ടി.എ.ഷാഫി അധ്യക്ഷത വഹിച്ചു. പിഐബി അസിസ്റ്റന്റ് ഡയറക്ടര് ഐസക് ഈപ്പന് പിഐബിയുടെ പ്രവര്ത്തനങ്ങള്, കേന്ദ്ര ഗവണ്മെന്റ് പദ്ധതികളുടെയും നയങ്ങളുടെയും റിപ്പോര്ട്ടിങ് എന്നിവയെ സംബന്ധിച്ച് വിശദീകരിച്ചു. പ്രസ് ക്ലബ് സെക്രട്ടറി വിനോദ് പായം, മുതിര്ന്ന മാധ്യമ പ്രവര്ത്തകന് വി.വി.പ്രഭാകരന്, പിഐബി കൊച്ചി ഇന്ഫമര്മേഷന് അസിസ്റ്റന്റ് ബി.അനില എന്നിവര് പ്രസംഗിച്ചു. പ്രാദേശിക മാധ്യമപ്രവര്ത്തകരും, കേന്ദ്ര ഗവണ്മെന്റും തമ്മിലുള്ള ബന്ധം മെച്ചപ്പെടുത്തുന്നതിന് കേന്ദ്ര വാര്ത്താ വിതരണ പ്രക്ഷേപണ മന്ത്രാലയം ആവിഷ്കരിക്കുന്ന പ്രത്യേക പരിപാടിയാണ് വാര്ത്താ ലാപ്.
