കോട്ടയം: കുമാരനല്ലൂര് ദേവീക്ഷേത്ര സന്നിധിയില് നൂറ്റാണ്ടുകളായി നടന്നുവരുന്ന വിജ്ഞാനപോഷിസഭ മഹാനവമിദിവസം ദേവീ കാര്ത്ത്യാനീഹാളില് പുനരാരംഭിച്ചു. മഹാനവമി ദിവസം നടന്ന സാംസ്കാരികസദസ്സില് മുന് ചീഫ് സെക്രട്ടറി സി.പി.നായര് ആരംഭംകുറിച്ചു. സഭയുടെ പുനരാരംഭ സദസ്സില് ആത്മജ്ഞാനമാണ് കടന്നുവന്നവര് ചര്ച്ചയ്ക്കെടുത്തത്. ഹിന്ദുധര്മ്മ പാരമ്പര്യത്തിലെ സാര്വ്വലൗകികദര്ശനം വിശകലനം ചെയ്ത് ആത്മജ്ഞാനമാണ് കര്മ്മപ്രാപ്തിക്ക് ഹേതുവാകുന്നതെന്ന് സി.പി. നായര് പറഞ്ഞു.
രേവതീപട്ടത്താവനും കടവല്ലൂര് അന്യോന്യവും പോലെ കുമാരനല്ലൂര് വിജ്ഞാനപോഷിണിസഭയും ജ്ഞാനവിജ്ഞാനങ്ങളുടെ മാറ്റുരക്കല്ലായിരുന്നുവന്ന് സഭയില് അദ്ധ്യക്ഷനായ ദേവസ്വം മാനജര് സി.എന്. ശങ്കരന്നമ്പൂതിരി അഭിപ്രായപ്പെട്ടു. സഭയില് കടന്നിരിക്കുവാന് പ്രാപ്തരായവരുടെ അവതരണങ്ങളും വിശകലനങ്ങളും ഉള്പ്പെടുത്തി തുടര് സഭകളുണ്ടാകുമെന്നും അദ്ദേഹം സൂചിപ്പിച്ചു.
ആത്മജ്ഞാനത്തിന്റെ ആദ്ധ്യാത്മികവും താന്ത്രികവുമായ വശങ്ങള് തന്ത്രി കാളിദാസ ഭട്ടതിരി വിശദീകരിച്ചു. മന്ത്രങ്ങളും കല്പനകളും പാലിക്കപ്പെടേണ്ടത് മനുഷ്യന്റേയും പ്രകൃതിയുടെയും ഭൂമിയുടെയും നിലനില്പ്പിനു അത്യന്താപേക്ഷിതമാണെന്ന് ആത്മജ്ഞാനത്തിന്റെ വൈദികതലങ്ങള് വിശകലനം ചെയ്ത് ഡോ. പി.പി. വിശ്വനാഥന് നമ്പൂതിരി പറഞ്ഞു. വേദോപനിഷത്തുകളുടെയും പുരാണങ്ങളുടെയും കാലിക പ്രസക്തി അദ്ദേഹം സഭയില് വിശദീകരിച്ചു. പ്രൊഫ. വി.എന്. രാജശേഖരന്പിള്ള, ഡോ. രാജു വള്ളിക്കുന്നം, കെ.എ. മുരളി, പി.എന്. ശശിധരന്നായര്, കൃഷ്ണകുമാര് എന്നിവര് സംസാരിച്ചു.
