പാലാ: നഗരത്തിലെത്തുന്ന വാഹന ഉടമകളുടെ ദീര്ഘകാല ആവശ്യമായിരുന്നു പാലാ സ്റ്റേഡിയം ജംഗ്ഷനില് നിന്നും കട്ടക്കയം റോഡിലേക്കുള്ള വാഹനപ്രവേശനം. വ്യാപാരി സമൂഹവും വിവിധ സംഘടനകളും ഈ ആവശ്യം ഉന്നയിച്ച് നിരന്തരമായി അധികൃതരില് സമ്മര്ദ്ദം ചെലുത്തിയതിനെ തുടര്ന്ന് ട്രാഫിക് അഡൈ്വസറി കമ്മിറ്റി ശുപാര്ശ പ്രകാരം ഡിവൈഡര് പൊളിച്ചുമാറ്റി വാഹന പ്രവേശനത്തിന് അനുമതി നല്കിയിരുന്നു. ട്രാഫിക് പോലീസിന്റെ നിര്ദ്ദേശപ്രകാരം രണ്ട് ഹോം ഗാര്ഡുകളെ നിയോഗിച്ച് ഗതാഗതം നിയന്ത്രിച്ചിരുന്നു. പൊതുജനങ്ങള്ക്കും വാഹനയാത്രക്കാര്ക്കും ഈ പ്രവേശന മാര്ഗ്ഗം വളരെ സഹായകരമാവുകയും അധികൃതരുടെ നടപടിയെ നിരവധി സംഘടനകള് സ്വാഗതം ചെയ്യുകയുമുണ്ടായി.
ഇക്കഴിഞ്ഞ ദിവസം ഹോംഗാര്ഡുകളുടെ സേവനം അവസാനിപ്പിക്കുകയും പ്രവേശന കവാടം താത്ക്കാലിക ഡിവൈഡര് വച്ച് ഇതുവഴിയുള്ള ഗതാഗതം പോലീസ് നിരോധിക്കുകയും ചെയ്തു. ഈ ഭാഗത്ത് ഇതേവരെ ട്രാഫിക് തടസ്സമോ അപകടങ്ങളോ ഈ കാലയളവില് റിപ്പോര്ട്ട് ചെയ്തിരുന്നുമില്ല. റോഡ് അടയ്ക്കുവാന് ട്രാഫിക് അഡൈ്വസറിയുടെ നിര്ദ്ദേശം ഉണ്ടായിരുന്നില്ലെന്ന് ബന്ധപ്പെട്ടവര് പറയുന്നു.
നഗരത്തില് വണ്വേ ട്രാഫിക് ആയതിനാല് ഈരാറ്റുപേട്ട, തൊടുപുഴ റോഡില് നിന്നും വരുന്ന വാഹനങ്ങള് റിവര്വ്യൂ റോഡിലൂടെ വളരെ ദൂരം സഞ്ചരിച്ചാല് മാത്രമെ കട്ടക്കയം, ടി.ബി. റോഡ്, സിവില് സ്റ്റേഷന് പരിസരങ്ങളിലേക്ക് ഇപ്പോള് പ്രവേശനത്തിന് സാധിക്കുകയുള്ളൂ. റോഡ് തുറന്നതോടെ റിവര്വ്യൂ റോഡിലെ ഗതാഗതക്കുരുക്കും അനധികൃത പാര്ക്കിംഗിനും ഒരു പരിധിവരെ പരിഹാരം കാണാനും കഴിഞ്ഞിരുന്നു.
സ്റ്റേഡിയം ജംഗ്ഷനില് നിന്നും കട്ടക്കയം റോഡിലേക്കുള്ള വാഹന പ്രവേശന സൗകര്യം പുനഃസ്ഥാപിക്കണമെന്ന് വാഹന ഉടമകളും വ്യാപാരികളും ആവശ്യപ്പെടുന്നു. വ്യാപാരികളുടെയും വാഹന ഉടമകളുടെയും വിവിധ സംഘടനകളുടെയും പ്രതിഷേധം വ്യാപകമാകുകയാണ്.
