കൊല്ലം: പള്ളിത്തോട്ടം ക്യുഎസ്എസ് കോളനിയിലെ കെട്ടിടങ്ങള് പഴകിദ്രവിച്ച് ശ്യോച്യാവസ്ഥയില്. ജനപ്രതിനിധികളോ ഉദ്യോഗസ്ഥരോ തിരിഞ്ഞുനോക്കുന്നില്ല. കെട്ടിടങ്ങള് ഇളകി പൊളിഞ്ഞുവീഴാറായിട്ടും അവിടെ താമസിക്കുന്നവരുടെ ജീവനും സ്വത്തിനും യാതൊരു വിലയും കല്പ്പിക്കുന്നില്ല.
1980ല് നിര്മിച്ച ഫ്ളാറ്റ് സമുച്ചയങ്ങള്ക്ക് 20 വര്ഷം ആയൂസാണ് പറഞ്ഞിരുന്നത്. എന്നാല് കാലാവധി കഴിഞ്ഞ് 17 വര്ഷം ആയിട്ടും കെട്ടിടങ്ങള്ക്ക് യാതൊരുവിധ ബലപ്പെടുത്തലും നാളിതുവരെ നടത്തിയിട്ടില്ല. മേല്ക്കൂരയുടെയും ഭിത്തിയുടെയും പാളികള് ഇളകിവീഴുന്നത് നിത്യസംഭവമാണ്. തലനാരിഴയ്ക്കാണ് അപകടങ്ങള് ഒഴിഞ്ഞുപോകുന്നത്. പലരുടെയും ദേഹത്തുവീണ് നിസാര പരിക്കുകളും ഉണ്ടാകുന്നുണ്ട്. ജീവന് കൈയില് പിടിച്ചുകൊണ്ട് എന്തും സം’വിക്കാമെന്ന ഭീതിയിലാണ് മുതിര്ന്നവര് മുതല് കൊച്ചുകുട്ടികള് വരെ ദിവസങ്ങള് തള്ളിനീക്കുന്നത്.
മത്സ്യബന്ധനഅനുബന്ധ മേഖലയില് തൊഴിലെടുക്കുന്നവരാണ് ബഹുഭൂരിപക്ഷവും. ഏതാണ്ട് 180 കുടുംബങ്ങളാണ് ഇവിടെ താമസിച്ചുവരുന്നത്. തെരഞ്ഞെടുപ്പ് സമയത്ത് പല പ്രതീക്ഷകള് നല്കി ഇവരുടെ വോട്ടുകള് വാങ്ങുകയും വിജയിച്ചുകഴിഞ്ഞാല് ഇവരുടെ ആവശ്യങ്ങള് കണ്ടില്ലെന്ന് നടിക്കുകയുമാണ് ചെയ്യുന്നത്.
പ്രശ്നങ്ങള് സങ്കീര്ണമായിട്ടും എംഎല്എയോ ജില്ലയെ പ്രതിനിധീകരിക്കുന്ന ഫിഷറീസ്മന്ത്രിയോ തിരിഞ്ഞുനോക്കുകപോലും ചെയ്തിട്ടില്ലെന്ന് പരാതിയുണ്ട്. എത്രയുംവേഗം പ്രശ്നത്തില് ഇടപെട്ട് സര്ക്കാര്തലത്തില് ഇവിടുത്തെ ജനങ്ങളെ പുനരധിവസിപ്പിക്കാന് നടപടിയുണ്ടായില്ലെങ്കില് വന് ദുരന്തമാണ് മുന്നില്നില്ക്കുന്നത്.
