കോട്ടയം: നിര്ബന്ധിത മതപരിവര്ത്തനത്തെക്കുറിച്ച് അന്വേഷിക്കാന് തയ്യാറാകാതെ സ്വന്തം വീട്ടില് അച്ഛനമ്മമാരുടെ സംരക്ഷണയില് കഴിയുന്ന അഖിലയുടെ അവകാശ ലംഘനത്തെക്കുറിച്ച് ഉത്കണ്ട്ഠപ്പെടുന്ന വനിത കമ്മീഷന്റെ നടപടിയില് ദുരൂഹതയുണ്ടെന്ന് മഹിള ഐക്യവേദി ജില്ലാ ജനറല്സെക്രട്ടറി അനിത ജനാര്ദ്ദനന് കുറ്റപ്പെടുത്തി.
നിര്ബന്ധിത മതപരിവര്ത്തനത്തിന് ഇരയായിടുള്ള കേരളത്തിലെ അനവധി പെണ്കുട്ടികളുടെ ദയനീയ അവസ്ഥയെക്കുറിച്ചും അവരുടെ കുടുംബങ്ങളുടെ വേദനയും കാണാതെ അഖിലയുടെ കാര്യത്തില് മാത്രം പ്രത്യേക താല്പര്യം കാണിക്കുന്നത്തിനു പിന്നില് ദുരുദ്ദേശം തന്നെയാണ് എന്ന് അവര് പറഞ്ഞു. സ്വന്തം മകളായിരുന്നു അഖില എങ്കില് എന്തായിരിക്കും പ്രതികരണം എന്നും അവര് ചോദിച്ചു.
എന്ഐഎയുടെ അന്വേഷണത്തെ അട്ടിമറിക്കാന് ശ്രമിക്കുന്നതിന്റെ ഭാഗമാണ് ഈ നീക്കമെന്ന് പ്രസിഡന്റ് ജയന്തി ജയമോന് പറഞ്ഞു. മനുഷ്യാവകാശ ലംഘനം നടക്കുന്നു എന്ന പേരുംപറഞ്ഞ് മതപരിവര്ത്തനത്തെ പ്രോത്സാഹിപ്പിക്കാനുള്ള വനിതാ കമ്മീഷന്റെ ശ്രമത്തെ തടയുവാന് വനിതാക്കൂട്ടായ്മ സംഘടിപ്പിച്ചുകൊണ്ട് ശക്തമായ സമരപരിപാടികളുമായി മുന്നോട്ടു പോകുമെന്നും നേതാക്കള് പറഞ്ഞു.
ഇത്തരം സ്ത്രീവിരുദ്ധ പ്രവര്ത്തനത്തെ തടയണം എന്നാണ് ഉദ്ദേശിക്കുന്നതു എങ്കില് കാസര്കൊട്ടെക്കും കോഴിക്കൊട്ടെക്കുമൊക്കെ ഒന്ന് യാത്ര ചെയ്യാന് വനിത കമ്മീഷന് തയ്യാറാവണം. ‘സത്യസരണി’യില് എന്താണ് നടക്കുന്നത് എന്നറിയാന് ഒരു അന്വേഷണത്തിനു വനിതാകമ്മീഷന് ധൈര്യം ഉണ്ടോ എന്ന് ജില്ലാ നേതൃത്വം ചോദിച്ചു. യോഗത്തില് ആശ അജികുമാര്, ഗീത രവി, ശാന്തമ്മ കേശവന് എന്നിവര് സംസാരിച്ചു.
