മൂന്നാര്: കൊച്ചി-ധനുഷ്ക്കോടി ദേശീയപാത നവീകരണം പുരോഗമിക്കുന്നു. മൂന്നാര് മുതല് ബോഡിമെട്ട് വരെയുള്ള ഭാഗമാണ് വീതികൂട്ടി നിര്മ്മിക്കുന്നത്. പതിനെട്ട് മാസം കൊണ്ട് നിര്മ്മാണ പ്രവര്ത്തനങ്ങള് പൂര്ത്തിയാക്കും. 268.2 കോടി രൂപ ചിലവിട്ട് പന്ത്രണ്ട് മീറ്റര് വീതിയിലാണ് ദേശീയപാത നിര്മ്മിക്കുന്നത്.
കൊച്ചി-ധനുഷ്ക്കോടി ദേശീയപത 85ലെ ഏറ്റവും അപകടക്കെണിയായ ഭാഗമാണ് മൂന്നാര് മുതല് ബോഡിമെട്ട് വരെയുള്ള ഭാഗം. പലഭാഗത്തും കഷ്ടിച്ച് ഒരുവാഹനത്തിന് മാത്രമാണ് ഇതുവഴി കടന്നുപോകുവാന് കഴിയുന്നത്. വീതികൂട്ടിയുള്ള ദേശീപാതയുടെ നിര്മ്മാണ പ്രവര്ത്തനങ്ങള് പൂര്ത്തിയാകുന്നതോടെ പതിറ്റാണ്ടുകളായി നിലനിന്ന വലിയ പ്രതിസന്ധിക്കാണ് പരിഹാരമാകുന്നത്. മൂന്നാര് മുതല് ബോഡിമെട്ട് വരെയുള്ള നാല്പ്പത്തിരണ്ട് കിലോമീറ്റര് ദൂരമാണ് ഇത്തവണ പന്ത്രണ്ട് മീറ്റര് വീതിയില് നിര്മ്മിക്കുന്നത്. പതിനെട്ട് മാസംകൊണ്ട് നിര്മ്മാണം പൂര്ത്തീകരിക്കുന്നതിനായിട്ടുള്ള വേഗതയേറിയ നിര്മ്മാണ പ്രവര്ത്തനങ്ങളാണ് നടക്കുന്നതെന്നും അതുകൊണ്ട് തന്നെയാണ് നിര്മ്മാണോദ്ഘാടനം നടത്തുന്നതിന് മുമ്പ് തന്നെ നിര്മ്മാണ പ്രവര്ത്തനങ്ങള് ആരംഭിച്ചതെന്ന് അധികൃതര് പറഞ്ഞു.
വാഹനഗതാഗതത്തിന് തടസമില്ലാത്ത രീതിയിലാണ് നിര്മ്മാണ പ്രവര്ത്തനങ്ങള് നടത്തിവരുന്നത്. ശക്തമായ മഞ്ഞിറങ്ങുന്ന സമയങ്ങളില് ജോലികള് നിര്ത്തിവയ്ക്കേണ്ട അവസ്ഥയുണ്ടെന്നും അധികൃതര് പറയുന്നു.
