ഇടുക്കി: അണ്ടര് 17 ഫുട്ബോള് ലോകകപ്പിന്റെ പ്രചരണാര്ത്ഥം ജില്ലയില് സംഘടിപ്പിച്ച വണ് മില്യണ് ഗോള് പരിപാടി വന് വിജയം. കുമളിയില് തേക്കടി പ്രസ് ക്ലബ്ബിന്റെ ഭാഗമായ മാധ്യമ പ്രവര്ത്തകരും അണിചേര്ന്നു. കാല്പ്പന്ത്കളി പ്രേമികള്ക്കായി ബസ് സ്റ്റാന്ഡ് പൊതുവേദിക്ക് സമീപം തയ്യാറാക്കിയ പ്രത്യേക ഗോള് പോസ്റ്റിലേക്ക് പന്തടിക്കുവാന് ഉച്ചകഴിഞ്ഞ് മൂന്നു മണി മുതല് അവസരമുണ്ടായിരുന്നു.
കുമളിയില് അമരാവതി ഹയര് സെക്കന്ററി സ്കൂള് മൈതാനം, കുമളി സര്ക്കാര് സ്കൂള് മൈതാനം എന്നിവയുള്പ്പെടെ മൂന്നു വേദികള് ഉണ്ടായിരുന്നു.
അടിമാലി: ഫിഫ ലോകകപ്പ് മത്സരത്തിന്റെ ഭാഗമായി അടിമാലിയിലെ ഏഴ് കേന്ദ്രങ്ങളില് മില്യണ് ഗോള് ചടങ്ങ് നടന്നു. ഗ്രാമ പഞ്ചായത്ത്, വ്യാപാരി വ്യവസായി ഏകോപന സമിതി ,വിവിധ വിദ്യാഭ്യാസ സ്ഥാപനങ്ങള്, ക്ലബ്ബുകള്, സാംസ്കാരിക സംഘടനകള് ഉള്പ്പെടെ നാനാതുറകളിലുള്ളവര് പങ്കെടുത്തു.
നെടുങ്കണ്ടം: നെടുങ്കണ്ടം പഞ്ചായത്ത് സ്റ്റേഡിയം, നെടുങ്കണ്ടം ഹോളി ക്രോസ് സ്കൂള്, വിജയമാത പബ്ലിക് സ്കൂള് തൂക്കുപാലം എന്നിവിടങ്ങളിലാണ് പരിപാടി സംഘടിപ്പിച്ചത്. നെടുങ്കണ്ടം പഞ്ചായത്ത് സ്റ്റേഡിയത്തില് നടന്ന പരിപാടിയുടെ പഞ്ചായത്ത് തല ഉദ്ഘാടനം പഞ്ചായത്ത് പ്രസിഡന്റ് എസ്.ജ്ഞാനസുന്ദരം നിര്വഹിച്ചു.
