പത്തനാപുരം: ഷോപ്പിങ് കോംപ്ലക്സ് നിര്മ്മാണവുമായി ബന്ധപ്പെട്ട് ചന്തയ്ക്കുള്ളിലെ കച്ചവടക്കാരെ ഒഴിപ്പിക്കുന്നതില് പ്രതിഷേധം ശക്തമാകുന്നു. പകരം സംവിധാനം ഒരുക്കാതെയുളള പത്തനാപുരം ഗ്രാമപഞ്ചായത്തിന്റെ നടപടിയാണ് പ്രതിഷേധങ്ങള്ക്ക് കാരണം.
ചന്തയ്ക്കുളളില് ഷെഡ് കെട്ടി താല്ക്കാലികമായി പഴവും പച്ചക്കറിയും മറ്റും കച്ചവടം നടത്തിവന്ന ചെറുകിട വ്യാപാരികളാണ് ദുരിതത്തിലായത്. പഴയ ഷോപ്പിങ് കോംപ്ലക്സ് കെട്ടിടങ്ങളില് കച്ചവടം നടത്തി വന്ന വ്യാപാരികള്ക്ക് ഒഴിഞ്ഞു പോകാന് മാസങ്ങള്ക്ക് മുമ്പേ പഞ്ചായത്ത് നോട്ടീസ് നല്കിയിരുന്നു.
ഇതേത്തുടര്ന്ന് നഗരത്തിലെ മറ്റ് കേന്ദ്രങ്ങളില് കച്ചവടം നടത്തുന്നതിനുളള സംവിധാനവും വ്യാപാരികള് മുന്കൂട്ടി തന്നെ ഒരുക്കിയിരുന്നു.
എന്നാല് നേരത്തെ അറിയിക്കാതെയുളള ഗ്രാമപഞ്ചായത്തിന്റെ നടപടിയാണ് ചെറുകിട കച്ചവടക്കാരെ ഏറെ ദുരിതത്തിലാക്കിയത്.
മീന് മാര്ക്കറ്റിനോട് ചേര്ന്ന് ഷെഡ് കെട്ടി താല്കാലിക സംവിധാനം ഒരുക്കി നല്കാമെന്ന് പഞ്ചായത്ത് പറഞ്ഞിരുന്നെങ്കിലും യാതൊരു നടപടിയും ഇനിയുമായിട്ടില്ല. രാഷ്ട്രീയം നോക്കിയാണ് പഞ്ചായത്ത് സ്ഥലം നല്കുന്നതെന്ന ആക്ഷേപവുമുണ്ട്.
വലിയ തുക അഡ്വാന്സായും വാടകയായും ചോദിക്കുന്നതിനാല് കെട്ടിടങ്ങളില് വ്യാപാരം നടത്താനും ഇവര്ക്ക് സാധിക്കാത്ത അവസ്ഥയാണ്. നാല്പതും, അന്പതും വര്ഷമായി കച്ചവടം നടത്തി വരുന്നവരാണ് മിക്കവരും.
