അഞ്ചല്: അഞ്ചുചൊല്ലുകളുടെ നാടെന്ന് പേരുകേട്ട അഞ്ചലിന്റെ സ്ഥലനാമ ചരിത്രത്തിന് തിലകക്കുറിയാണ് വടമണ് ഗ്രാമം. അതില് ഏറ്റവും കൗതുകമായ ചൊല്ലാണ് ‘വടമണ് കാഞ്ഞിരം കായ്ക്കുമോ, മധുരിക്കുമോ’’എന്നത്. കയ്ക്കാത്ത കാഞ്ഞിരം എന്നത് ലോകത്തിലത്ഭുതമാണ്. എന്നാല് കേരളത്തില് അഞ്ച് പ്രദേശങ്ങളില് ഇങ്ങനെ കയ്ക്കാത്ത കാഞ്ഞിരമരമുണ്ടെന്ന് അവിടുത്തെ ജനങ്ങള് വിശ്വസിക്കുന്നു. ഇതില് നാലു കാഞ്ഞിരമരവും വടക്കന് കേരളത്തിലാണ്. തച്ചോളിത്തറവാട്, പാക്കനാരുടെ ശവകുടീരം, തിരൂര് തുഞ്ചന്പറമ്പ്, തളിപ്പറമ്പ് വൈദ്യനാഥ ക്ഷേത്രം എന്നിവയാണവ.
ഓരോ സ്ഥലവാസികളും ചില ചരിത്രങ്ങളും ഐതിഹ്യങ്ങളും ഇതിനെ ബലപ്പെടുത്താനായി ചേര്ത്തിരിക്കുന്നു.‘ഭഗവാന് മഹാവിഷ്ണു ശ്രീഗുരുവായൂരപ്പനായ ഉണ്ണിക്കണ്ണന്റെ രൂപത്തില് കാഞ്ഞിരമരത്തില് കയറി ഇരിക്കാറുള്ളതാണ് ഇ പ്രത്യേക കാഞ്ഞിരമരത്തിന്റെ ഇലകള് മധുരിക്കാന് കാരണമെന്ന് ഐതിഹ്യങ്ങളില് ഗവേഷണം നടത്തുന്ന ഡോ.വേണുഗോപാല് പറയുന്നു.
കാലങ്ങളായി നാനാദേശത്തുള്ളവര് ഈ അത്ഭുതവൃക്ഷം കാണുന്നതിനായി വടമണ് ശ്രീകൃഷ്ണ സ്വാമിക്ഷേത്രത്തിനോടു ചേര്ന്ന ശാസ്താം കാവിലെത്തിക്കൊണ്ടിരുന്നു. അതുകൊണ്ടുതന്നെ ജനങ്ങള് കാഞ്ഞിരമരത്തെ സ്നേഹിക്കുകയും ഇത് തങ്ങളുടെ അഭിമാനമാണന്ന് കരുതുകയും ചെയ്തു. തങ്ങളൂടെ ഭവനങ്ങള്ക്ക് ഇതുമായി ബന്ധപ്പെട്ട നാമകരണവും നടത്തി.’’കാഞ്ഞിരത്തിന്മൂട് വീട്, കാഞ്ഞിരംവിള വീട്’ എന്നിവ ഇന്നും പ്രശസ്തമാണ്.
കാഞ്ഞിര മരങ്ങള് നാട്ടിലെമ്പാടും സംരക്ഷിക്കപ്പെട്ടതും ഇതിനെത്തുടര്ന്നാണ്. എന്നാല് കാലത്തിന്റെ കയ്യേറ്റത്തില് ഈ പൈതൃകസ്വത്ത് നാശോന്മുഖമായി കൊണ്ടിരിക്കുന്നു.
വടമണ് ശാസ്താംകാവില് അവശേഷിക്കുന്ന കാഞ്ഞിരമരം സംരക്ഷിക്കാനൊരുങ്ങുകയാണ് ക്ഷേത്രസംരക്ഷണസമിതിയും ഒരു കൂട്ടം ചെറുപ്പക്കാരും. സംരക്ഷണമില്ലാതെ ഉണങ്ങിത്തുടങ്ങിയ കാഞ്ഞിരമരം സംരക്ഷിക്കുന്നതോടൊപ്പം ചെറുകാഞ്ഞിരമരങ്ങള് വളരാന് സൗകര്യം ഒരുക്കുകയും ചെയ്യും. ഓര്മകള് മാത്രമായി അവശേഷിക്കുമായിരുന്ന നന്മയുടെ തിരുശേഷിപ്പുമായി വടമണ് ഗ്രാമത്തെ ഐതിഹ്യങ്ങളില് ഇനിയും നിറഞ്ഞുനില്ക്കത്തക്കവിധം കരുതല് വലയമൊരുക്കുകയാണ് പുതിയ തലമുറ.
