പത്തനാപുരം: കെനിയന് ജയില് കഴിയുന്ന പത്തനാപുരം സ്വദേശി പ്രവീണ് പ്രഭാകരന്റെ മോചനക്കേസില് സാക്ഷിവിസ്താരം പൂര്ത്തിയായി. ഇതില് പ്രവീണിനെ ഇനിയും കേസില് പ്രതി ചേര്ക്കേണ്ടതില്ലെന്ന് കോടതി നീരിക്ഷിച്ചാല് മോചനം എളുപ്പമാകും.
മയക്കുമരുന്ന് കണ്ടെത്തിയ പ്രത്യേക സംഘത്തിന്റെ മേധാവി, അന്വേഷണത്തിന് നേതൃത്വം നല്കിയ ഉദ്യേഗസ്ഥര് തുടങ്ങിയവരെയാണ് സാക്ഷികളായി വിസ്തരിച്ചത്. പ്രവീണ് വിദ്യാര്ത്ഥിയായിരുന്നുവെന്നും കപ്പലില് പരിശീലനത്തിനായി എത്തിയതാണെന്നുമുള്ള രേഖകള് കോടതി ഫയലില് സ്വീകരിച്ചിട്ടുണ്ട്.
മോചനം രണ്ട് മാസത്തിനകം സാധ്യമാകുമെന്ന പ്രതീക്ഷയിലാണ് നാട്ടുകാരും ബന്ധുക്കളും. പത്തനാപുരം പുന്നല കറവൂര് പ്രഭാവിലാസത്തില് പ്രഭാകരന് നായര്-ദേവയാനി ദമ്പതിയുടെ മകന് പ്രവീണ് (25) കഴിഞ്ഞ രണ്ടര വര്ഷമായി തടവറയിലാണ്.
കപ്പല് ഇറാനില് നിന്ന് ഷാര്ജയിലേക്ക് സിമന്റുമായി പോകുന്നതിനിടെ കെനിയന് സമുദ്ര നിയന്ത്രണ സേന കപ്പലില് പരിശോധന നടത്തി. മൊബാംസയില് വച്ച് നടന്ന പരിശോധനയില് കപ്പലിന്റെ അടിത്തട്ടിലെ ഡീസല് ടാങ്കില് നിന്നും അമിതയളവില് മയക്കുമരുന്ന് കണ്ടെത്തുകയായിരുന്നു. ഇതോടെ കപ്പലില് ഉണ്ടായിരുന്ന ജീവനക്കാരെല്ലാം കെനിയന് പോലീസിന്റെ പിടിയിലായി.
ഒക്ടോബര് 11നാണ് അടുത്ത വാദം. പ്രവീണിന്റെ മോചന വാര്ത്തയ്ക്കായി പ്രാര്ത്ഥനയോടെ കാത്തിരിക്കുകയാണ് ഒരു ഗ്രാമം മുഴുവന്. കെനിയയിലെ മലയാളി അസോസിയേഷന് പ്രവര്ത്തകരാണ് പ്രവീണിന് ആവശ്യമായ സഹായങ്ങള് നല്കി വരുന്നത്.
