പേരൂര്ക്കട: ക്വാറിയുടെ പ്രവര്ത്തനം മൂലം വീട് തകര്ന്ന യുവാവ് കുടപ്പനക്കുന്ന് കളക്ടറേറ്റിനു മുന്നില് നടത്തുന്ന സമരം 173 ദിവസം പിന്നിട്ടു. കിളിമാനൂര് സ്വദേശി സേതു (46) ആണ് സമരം നടത്തിവരുന്നത്.
ക്വാറിക്കെതിരെ നടപടി ആവശ്യപ്പെട്ട് ഇദ്ദേഹം ആദ്യം സെക്രട്ടേറിയറ്റിനു മുന്നില് സമരം നടത്തിയിരുന്നു. മുഖ്യമന്ത്രിക്ക് നിവേദനവും നല്കി. നടപടിയുണ്ടാകാതായതോടെ ഇദ്ദേഹം കൈത്തണ്ട മുറിച്ച് ആത്മഹത്യക്കു ശ്രമിച്ചിരുന്നു. എഡിഎം ഉള്പ്പെടെയുള്ളവര് തന്റെ പരാതിയില് നടപടി കൈക്കൊള്ളുന്നില്ലെന്നാരോപിച്ചാണ് സമരം കളക്ടറേറ്റ് കവാടത്തിലേക്കു മാറ്റിയത്.
ക്വാറിയുടെ പ്രവര്ത്തനം മൂലം ഇദ്ദേഹത്തിന്റെ ഇരുനിലവീട് ഏറെക്കുറെ തകര്ന്നു. വീടിന്റെ ചുമരുകള്ക്ക് വിള്ളലും വീണു. പശ്ചിമഘട്ട സംരക്ഷണസമിതിയുടെയും വട്ടക്കൈത പ്രകൃതിസംരക്ഷണ സമിതിയുടെയും നേതൃത്വത്തിലാണ് ഇദ്ദേഹം സമരം നടത്തിവരുന്നത്. സേതുവിന്റെ സമരത്തിന് ഐക്യദാര്ഢ്യം പ്രഖ്യാപിച്ച് ഇന്നലെ കളക്ടറേറ്റിനു മുന്നില് പ്രവര്ത്തകര് ധര്ണ നടത്തിയിരുന്നു. സമിതി ഭാരവാഹി ആര്. അജയന് ഉദ്ഘാടനം ചെയ്തു. അധികാരികള് തന്റെ ആവശ്യത്തിനുമുന്നില് കണ്ണടയ്ക്കുന്ന സമീപനം തുടരുന്നപക്ഷം ശക്തമായ സമരപരിപാടികളുമായി മുന്നോട്ടു നീങ്ങാനാണ് സേതുവിന്റെ തീരുമാനം.
