തിരുവനന്തപുരം: ഗാനഗന്ധര്വന് കെ.ജെ. യേശുദാസ് ശ്രീപദ്മനാഭദര്ശനത്തിന് അനുവാദം തേടി കത്തു നല്കി. നവരാത്രി ദിനത്തില് ശ്രീപദ്മനാഭ സ്വാമിയെ ദര്ശനം നടത്താന് അനുവദിക്കണമെന്ന് അപേക്ഷിച്ചാണ് അദ്ദേഹം ക്ഷേത്രഅധികൃതര്ക്ക് കത്തു നല്കിയത്.
അമേരിക്കയില് നിന്ന് അദ്ദേഹമയച്ച കത്ത് ഇന്നു ചേരുന്ന ക്ഷേത്രഭരണസമിതി ചര്ച്ച ചെയ്യും. കത്തിനൊപ്പം താന് ഹിന്ദുമത വിശ്വാസിയാണെന്ന് രേഖാമൂലം സാക്ഷ്യപ്പെടുത്തിയ സത്യവാങ്മൂലവും യേശുദാസ് അയച്ചിട്ടുണ്ട്. കഴിഞ്ഞ ദിവസമാണ് ശ്രീപദ്മനാഭസ്വാമി ക്ഷേത്രത്തിന്റെ മതിലകം ഓഫീസില് സത്യവാങ്മൂലം ലഭിച്ചത്. സ്വാതിതിരുനാള് രചിച്ച പദ്മനാഭശതകം ക്ഷേത്ര കല്മണ്ഡപത്തിലോ നവരാത്രി മണ്ഡപത്തിലോ ഇരുന്ന് യേശുദാസ് ആലപിക്കുമെന്നും സൂചനയുണ്ട്.
ക്ഷേത്രം എക്സിക്യൂട്ടീവ് ഓഫീസര് രതീശനാണ് യേശുദാസ് അപേക്ഷ സമര്പ്പിച്ചത്. വിജയദശമിദിനമായ സപ്തംബര് 30 ന് ക്ഷേത്രദര്ശനത്തിന് അനുവാദം നല്കണമെന്നും കത്തില് ആവശ്യപ്പെട്ടിട്ടുണ്ട്. ഇന്നു ചേരുന്ന ഭരണസമിതി യോഗം യേശുദാസിന്റെ ആവശ്യത്തിന്മേല് തീരുമാനമെടുക്കുമെന്ന് എക്സിക്യൂട്ടീവ് ഓഫീസര് അറിയിച്ചു. ക്ഷേത്രം തന്ത്രിയുടെ അഭിപ്രായവും ഇക്കാര്യത്തില് ഭരണസമിതി തേടും.
സാധാരണ ഹിന്ദുമത വിശ്വാസികള്ക്ക് മാത്രമാണ് ശ്രീപദ്മനാഭസ്വാമി ക്ഷേത്രത്തില് പ്രവേശനം നല്കുന്നത്. ഹിന്ദുമതവിശ്വാസിയാണെന്ന് ശ്രീരാമകൃഷ്ണമിഷന്, ഹരേരാമ ഹരേകൃഷ്ണ, ആര്യസമാജം തുടങ്ങിയവര് നല്കുന്ന സാക്ഷ്യപത്രമുള്ള വിദേശികളടക്കമുള്ളവരെയും പ്രവേശിപ്പിച്ചിരുന്നു. എന്നാല് 2014 ന് ശേഷം ഹൈന്ദവധര്മവും ആചാരാനുഷ്ഠാനങ്ങളും പിന്തുടരുന്ന വിശ്വാസിയാണെന്ന സ്വന്തം സത്യവാങ്മൂലം നല്കുന്ന ഏതൊരാള്ക്കും ശ്രീപദ്മനാഭസ്വാമി ക്ഷേത്രത്തില് പ്രവേശനം നല്കിവരുന്നതായാണ് വിവരം.
