ആലപ്പുഴ: ഓപ്പറേഷന് തണ്ടറിന്റെ ഭാഗമായി ആലപ്പുഴ ജില്ലയില് സാമൂഹ്യവിരുദ്ധ പ്രവര്ത്തനങ്ങള് നടത്തുന്നവര്ക്കെതിരെ അറസ്റ്റ് ഉള്പ്പെടെയുളള സുശക്തമായ നടപടികള് തുടങ്ങി. ജില്ലാ പോലീസ് മേധാവി എസ്. സുരേന്ദ്രന്റെ നിര്ദ്ദേശ പ്രകാരം മൂന്ന് ദിവസങ്ങള്ക്കുളളില് ക്രിമിനല് പശ്ചാത്തലമുളള 320 ഓളം പേരെ മുന്കരുതല് നടപടിക്കായി അറസ്റ്റ് ചെയ്തു.
സ്ഥിരം കുറ്റവാളികളും അനേകം ക്രിമിനല് കേസുകളില് പ്രതികളായിട്ടുളളതുമായ ഏകദേശം ഇരുപത് പേരെയും നിലവില് സജീവമായി കുറ്റകൃത്യങ്ങളില് തുടരെ ഏര്പ്പെട്ട് വന്നിരുന്ന 250 ഓളം പേരെയും അറസ്റ്റ് ചെയ്തു. ഗുണ്ടാ ആക്ട് പ്രകാരം വരെ കരുതല് തടങ്കലില് പാര്പ്പിക്കുന്നതിന് 12 പേര്ക്കെതിരെ നടപടി എടുത്തു.
കൂടാതെ ക്രിമിനല് കേസുകളില് പ്രതികളായി ഒളിവില് കഴിഞ്ഞു വന്നിരുന്ന അന്പതോളം പേരെ അറസ്റ്റ് ചെയ്തു. വിവിധ കേസുകളില്പ്പെട്ട് കോടതികളില് ഹാജരാകാതെ ഒളിവില് കഴിഞ്ഞിരുന്ന 54 ഓളം പേരെ പിടികൂടി.
